Роскомнадзор режиссер Степан Бурнашев былырыын саас улахан экраҥҥа таһаарбыт «Айта» уус-уран киинэтин онлайн-тыйаатырдарга көрдөрүүнү бобон кэбистэ. Кэтиир тэрилтэ киинэҕэ омугунан араарыы уонна утарыта туруоруу баарын булла.
Санатар буоллахха, «Айта» киинэ улахан экраҥҥа тахсыан иннинэ Москубаҕа Арассыыйатааҕы «Зимний» киинэ бэстибээлин икки улахан наҕараадатын ылбыта. Ол кэннэ Саха сиригэр саамай элбэх харчыны киллэрбит киинэнэн буолбута. Киинэ сынаарыйын, уһулуутун, туруоруутун эспиэрдэр уонна көрөөччүлэр үрдүктүк сыаналаабыттара. Ким даҕаны манна хайа эрэ омугу намтатан, холуннаран көрдөрүүнү, атын омукка куһаҕан сыһыаны үөскэтэр төрүөтү булбатаҕа. Төттөрүтүн, хайа баҕарар омукка үтүө да, мөкү да дьон баар буоларын, киһиэхэ омугунан көрөн сыһыаннаһар сөбө суоҕун өйдөтөр киинэ диэн ылыммыттара.
Билигин Сахабыт сиригэр режиссеру уонна киинэни көмүскээн улаханнык ким даҕаны санаатын этэ илик. Арай, биир бастакынан нуучча биллиилээх режиссера Александр Сокуров Роскомнадзор «Айта» киинэни бобуутун утарарын элбэхтик биллэрдэ. Кини «ТАСС» аан ситимҥэ биэрбит кэмэнтээрийигэр:
«Киинэ уус-уран айымньы быһыытынан киэҥ эйгэҕэ тарҕанар бырааптаах. РФ Култууратын министиэристибэтэ, ону өйдөөн, прокат дастабырыанньатын биэрдэҕэ. Тус бэйэм киинэҕэ омуктаһыы төрүөтэ буолуон сөптөөх сыыһа-халты туттуу баарын көрбөтүм. Саха киинэтэ хаһан да омугунан арахсыыны күөртээбэтэҕэ уонна күөртүө да суоҕа. Уопсайынан, уус-уран айымньыны бобор туох да туһата суох, ону ааһан - алдьатыылаах. Айымньыны ырытыахха, ол тула мөккүһүөххэ уонна хайдаҕын быһаарыахха эрэ сөп. Бобуу Арассыыйа киинэтигэр, чуолаан эдэр режиссердар айар-тутар үлэлэригэр, улахан охсууну оҥоруон сөп. Маннык усулуобуйаҕа ким даҕаны киинэ уһулуо суоҕа. Онон, Саха сирин баһылыга Айсен Николаев талааннаах режиссерун көмүскээтэҕинэ табыллар», - диэн эттэ.
Ил Дархан Айсен Николаев режиссер Дмитрий Давыдовы уонна Степан Бурнашевы кытта
«Cахадэй» аан ситим суруйарынан, Ил Дархан киинэни бобуу туһунан санаатын суруйа илик, култуура миниистирэ Юрий Куприянов «Роскомнадзор быһаарыыта туолуохтаах» диэн сөбүлэһэрин биллэрбит сурахтаах.
Оттон биһиги «Айта» киинэни бобууну сөбө суоҕунан ааҕабыт. Төттөрүтүн, «Киһини омугунан көрүмэ» диэн санаалаах киинэ быһыытынан сыаналыыбыт. Онон, бары биир киһи курдук киинэбитин, режиссербутун көмүскүөҕүҥ, сыыһа тахсыбыт бобууну көтүрүөҕүҥ диэн ыҥырабыт.
Сүрүн хаартыска: ЛЮКСОР
Бэйэ кэр.
Сэҥээриилэр