Балаҕан ыйын 25-26 күннэригэр VII ыҥырыылаах Ил Түмэн бастакы сиэссийэтэ ыытыллар. Сиэссийэни Ил Түмэн ютуб-ханаалыгар быһа көрдөрөллөр.
Бүгүҥҥү пленарнай мунньаҕы Ил Дархан Айсен Николаев арыйда. Үгэс быһыытынан, салгыы тылы барыларыттан аҕа саастаах дьокутаат Иннокентий Романов тутта. Кини дьокутааттарга нэһилиэнньэ олоҕун тупсарыыга туох кыаллары барытын оҥоруохтаахпыт диэн тоһоҕолоон эттэ.
Мунньах барылынан, дьокутааттар Киин быыбардыыр хамыыһыйа бэрэссэдээтэлэ Евгений Федоров отчуотун иһитиллэр. Быыбар түмүгүнэн «Биир ньыгыл Арассыыйа» - 22, «Саҥа дьон» - 5, «КПРФ» - 4, «СЗРП» - 3 уонна «ЛДПР» - 1 мандааты ылбыттар. Өрөспүүбүлүкэҕэ быыбарга кыттыы 48,36% буолбут. 70 саҥа талыллыбыт дьокутааттан 25 хаттаан талыллыбыттар. Ол курдук, Александр Жирков - сэттиһин, Юрий Николаев - бэсиһин, Елена Голомарева, Виктор Губарев, Сергей Ларионов, Алиш Забид оглы Мамедов, Владимир Прокопьев – төрдүһүн.
Дьокутааттар ортолоругар 8 дьахтар баар. Кинилэртэн биэһэ Ил Түмэҥҥэ бастакытын талыллыбыттар. Бу - Светлана Давыдова, Нюргуяна Заморщикова, Ольга Горюнова, Татьяна Шарова уонна Наталья Сидоркина. Саамай эдэр саҥа талыллыбыт дьокутаат Федот Филиппов (33 саастаах) эбит. Мииринэйгэ – 4 дьокутаат, Алдаҥҥа — 4, Нерюнгрига уонна Хаҥаласка — 3, Намҥа, Бүлүүгэ, Ньурбаҕа, Үөһээ Бүлүүгэ, Горнайга, Ленскэйгэ, Мэҥэ Хаҥаласка, Тааттаҕа уонна Өлөөҥҥө биирдии дьокутаат олорор эбит.
Кистэлэҥ куоластааһын түмүгүнэн Ил Түмэн бэрэссэдээтэлинэн Алексей Еремеев талылынна. Киниэхэ 61 дьокутаат куоластаата, алта дьокутаат утарда, биир туттунна. Ил Түмэн бэрэссэдээтэлин бастакы солбуйааччытынан Александр Жирков 7-с төгүлүн талылынна. Киниэхэ 63 дьокутаат куоластаата, биэс киһи утарда.
Вице-спикердэринэн Юрий Николаев, Афанасий Владимиров, Александр Подголов талылыннылар. Кинилэр тэҥинэн судаарыстыбаннай тутул уонна сокуону оҥоруу; бүддьүөт, үп, нолуок бэлиитикэтин, бас билии уонна приватизация сис кэмитиэттэрин салайыахтара,үһүс вице-спикер байыаннай сулууспалаахтар боппуруостарынан дьарыктаныаҕа.
Юрий Николаевы 57 дьокутаат өйөөтө, 8 дьокутаат утарда. Афанасий Владимировы 60 дьокутаат өйөөтө, 6 — утарда. Александр Подголовы 55 дьокутаат кистэлэҥ куоластааһынынан өйөөтө, 9 дьокутаат утарда, биир киһи туттунна.
Маны таһынан, дьокутааттар Ил Түмэн бастайааннай кэмитиэттэрин уонна хамыыһыйаларын бигэргэттилэр. Ол быһыытынан, барыта 17 кэмитиэт уонна 1 хамыыһыйа үлэлиир буолла. Кэмитиэттэр уонна хамыыһыйа бэрэссэдээтэллэрин талыы сиэссийэ иккис күнүгэр 14.30 чаастан буолуоҕа.
Сонун төрдө: Ил Түмэн пресс-сулууспата
