Балаҕан ыйын 22 күнүгэр СӨ Үрдүкү суута, холуобунай-процессуальнай кодексы, киһи быраабын элбэхтик кэһии баарын иһин, Үөһээ Халыма суутун Аркадий Еремеевка таһаарбыт бириигэбэрин көтүрдэ.
Санатар буоллахха, 42 сыл устата эҥкилэ суох үлэлээбит улуус үтүөлээх мэхэньисээтэрэ, ойуур уотун ыытыыга буруйданан, ыам ыйын 28 күнүгэр 700 тыһ. солк. ыстараапка уонна күһэлэҥ үлэҕэ ууруллубута. Аны, Аркадий Иннокентьевич дьыалатын бастакы инстанция суута атын састаабынан саҥаттан көрүөҕэ.
Үрдүкү суут судьуйата Денисенко таһаарбыт быһаарыытын адьас чуолкайа суохтук аахпытын ВКС нөҥүө холбоммут буруйданааччы да, биһиги да кыайан үчүгэйдик истибэтибит (докумуону син кыһаллан, иһиллэр курдук ааҕыан сөп этэ). Арай, сахалыы тылбаастаан биэрбиттэригэр «буруйданааччы ааһынар үҥсүүтүн сорҕотун ылынарга, Үөһээ Халыма суутун быһаарыытын көтүрэргэ, дьыаланы саҥа састааптаах бастакы инстанция суутугар саҥаттан көрөргө» диэн быһаарбыттарын өйдөөтүбүт. Онон, суут быһаарыытын ымпыгын-чымпыгын, суругунан туттахпытына, сырдатыахпыт.
Буруйданааччы Аркадий Еремеев тиһэх тылыгар силиэстийэ, суут кини быраабын кэрээнэ суох кэспитин, прокурор Холмогоров буруйдааһыны дознаватель Оконешников хомуйбут фиктивнай матырыйаалыгар уонна туоһута Слепцов сымыйа көрдөрүүтүгэр олоҕуран таһаарбытын, онон Үөһээ Халыма суутун бириигэбэрин ылымматын, кырдьыгын булар туһугар РФ Кассационнай суутугар тиийэ барар санаалааҕын эттэ.
Аркадий Иннокентьевич эппитин курдук, кини дьыалатыгар киһи ааҕан сиппэт элбэх кэһиитэ баарын албакаат Альберт Егоров тылыттан аан ситиммитигэр уонна хаһыакка хаста да суруйан таһаарбыппыт. Онон, саҥа састааптаах суут ыйыллыбыт кэһиилэри барытын булан көрөн, быһааран, Аркадий Еремеев буруйа суоҕун дакаастыа диэн эрэнэбит.
