Балаҕан ыйын 25 күнүгэр Өксөкүлээх Өлөксөй аатынан Норуоттар доҕордоһууларын дьиэтин Төрүт култууралар галереяларыгар Саха Өрөспүүбүлүкэтин судаарыстыбаннаһын күнүгэр аналлаах «Албан ааттан, Сахам сирэ!» быысыпкаламмыт каарта уонна гиэрбэ быыстапката үөрүүлээхтик аһылынна.
Манна Мэҥэ Хаҥалас, Нам, Чурапчы уонна Дьокуускай маастардара быысыпкалаан тикпит 7 каартатын көрдөрүүгэ туруордулар. Быыстапка алтынньы 8 күнүгэр диэри үлэлиэҕэ.
Каарталары «Саха Өрөспүүбүлүкэтин быысыпкаламмыт каартата» аахсыйа-күрэскэ анаан тикпиттэрэ. Онтон каарталары Туймаада ыһыаҕар уонна Фольклор дьоро күнүгэр туруорбуттара. Аахсыйа-күрэскэ Людмила Жиркова салайааччылаах «Содружество» холбоһук кыайбыта. Онон, кыайыылаах каартата атырдьах ыйын 18-21 күннэригэр Чебоксары куоракка Бүтүн Арассыыйатааҕы «Быысыпкаламмыт Арассыыйа - 2023» бэстибээлгэ кыттыбыта. Манна барыта 68 регион бэйэтин 2,5х2,5 м. кээмэйдээх каартатын туруорбута.
«Албан ааттан, Сахам сирэ!» быысыпкаламмыт каарта уонна гиэрбэ быыстапкатын үөрүүлээх аһыллыытыгар кыайыылаах Ульяна Миронова Чувашия аҕа баһылыга Олег Николаев өрөспүүбүлүкэ мөлүйүөнүс олохтооҕор туһуламмыт бэлэҕин Дьокуускайга Мииринэй оройуонун бэрэстэбиитэлигэр Григорий Федоровка туттарда.
Санатар буоллахха, бэс ыйын 23 күнүгэр Саха сирэ биир мөлүйүөн олохтоох өрөспүүбүлүкэ буолбута. Бу күн Мииринэй куоракка Гаврил уонна Арина Онуфриевтар дьиэ кэргэннэригэр кыыс оҕо күн сирин көрбүтэ.
Бэйэ кэр.
