Балаҕан ыйын 27 күнүгэр Саха сирин Судаарыстыбаннаһын күнүн өрөспүүбүлүкэ иһигэр эрэ буолбакка, Арассыыйа, тас дойду куораттарыгар олорор биир дойдулаахтарбыт эмиэ бэлиэтээтилэр.
Ол курдук, Санкт-Петербург куоракка дьоро күн Смоленскай православнай кылабыыһаттан саҕаланна. Манна, биллэрин курдук, саха суругун-бичигин төрүттээччи Семен Новгородов көмүс уҥуоҕа хараллан сытар. Питерга олорор саха түмсүүтүн чилиэннэрэ уонна бу күннэргэ ыытылла турар Арассыыйа бэтэрээннэрин спартакиадатын кыттыылаахтара улуу киһибит уҥуоҕар сибэкки дьөрбөтүн уурдулар. Питерга Саха сирин бастайааннай бэрэстэбиитэлэ Юрий Кравцов Семен Андреевич Саха сирин, төрөөбүт норуотун сайдыытыгар сүҥкэн кылаатын билиһиннэрдэ, суолталаах түгэннэргэ тохтоото.
Биир дойдулаахтар салгыы Санкт-Петербург куорат Выборгскай оройуонугар Семен Андреевич Новгородов аатынан искибиэргэ тиийдилэр. Аҕыйах сыллааҕыта анаммыт сиргэ былырыын ахсынньы 2 күнүгэр Новгородов аата суруллубут мэҥэ таас туруоруллубута. Выборгскай оройуон баһылыга Виктор Полунин Саха сирин бэлиэ күнүн тэрээһинигэр кыттыһан, эҕэрдэтин тириэртэ.
Даҕатан эттэххэ, бу оройуону кытта Чурапчы улууһа доҕордуу сибээһи олохтоон турар. Былырыын улуус баһылыга Степан Саргыдаев кэлэ сылдьан, кэккэ былааннары торумнаабыта. Семен Новгородовка анаммыт искибиэр салгыы күрүөлэнэн, ото-маһа эбиллэн, тупсарыллан, улахан куорат олохтоохторо дуоһуйа сынньанар, саха суругун-бичигин төрүттээччи туһунан өйдөбүлү ылар сирдэрэ буолуохтаах.
Саха судаарыстыбаннаһын күнүгэр Питерга госпитальга сытар анал байыаннай эпэрээссийэ кыттыылаахтарын көрө-харайа сылдьар волонтердар наҕараадалары туттулар. Бэлиэ күн Новгородов искибиэрин күһүҥҥү сэбирдэхтэн ыраастааһын субуотунньугунан түмүктэннэ.
Оксана ЖИРКОВА, Санкт-Петербург
