Уйулҕаһыттар пуорумнара сыл ахсын ыытыллар. Быйылгы пуорум тиэмэтэ - «Психологическое здоровье: многообразие подходов». Тэрээһин алтынньы 6 күнүгэр диэри ыытыллар, сорох блоктарын vk.com/psycentrykt ситимҥэ көрдөрөллөр.
Пуорумҥа өрөспүүбүлүкэ бары судаарыстыбаннай тэрилтэлэрин, дьаһалталарын уйулҕаһыттарын таһынан, атын сиртэн кэлбит ыалдьыттар кытталлар. Олор истэригэр М. В. Ломоносов аатынан Москубатааҕы судаарыстыбаннай университет уйулҕа үөрэҕин факультетын деканатын бэрэстэбиитэлэ, уйулҕа билимин дуоктара Александр Веракса баар. Кини Саха сиригэр уйулҕаһыт көмөтүн оҥорор сулууспа сайдан эрэрин уонна үрдүкү салалта социальнай бырайыактары үчүгэйдик өйүүрүн бэлиэтээтэ.
Пленарнай мунньахха улахан суолталаах социальнай тиэмэлэри уонна анал байыаннай дьайыы кыттыылаахтарын, кинилэр дьиэ кэргэннэрин кытта үлэлэһии ньымаларын таарыйдылар. Манна Өрөспүүбүлүкэтээҕи уйулҕа киинин дириэктэрэ Владимир Борисов уйулҕаһыттар улуустарга уонна атын куораттарга анал байыаннай дьайыы кыттыылаахтарын кытта хайдах үлэлииллэрин кэпсээтэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
