Дьокуускайга кыргыһыы хонуутугар дьоруойдуу охтубут Дмитрий Егоровы кытта бырастыыластылар. Манна Ил Дархан Айсен Николаев уонна Тихоокеанскай флот командующайын бастакы солбуйааччыта, вице-адмирал Сергей Рекиш кытыннылар. Вице-адмирал Арассыыйа Дьоруойун «Кыһыл көмүс сулус» мэтээлин Дмитрий Егоров аҕатыгар туттарда.
Николай Алексеевич уола хайдах улааппытын, олорбутун уонна анал байыаннай дьайыыларга тоҕо барбытын кэпсээтэ. Кини Дима ийэтигэр сиэннэрин атахтарыгар туруоруох буолан тылын биэрбит, ону хайаан да толорор санаалаах эбит.
«Биһиги уолбутунан киэн туттабыт. Дима анал байыаннай дьайыыларга бэйэтэ тылланан барбыта. «Тоҕо?» диэн ыйытыыбытыгар «Билигин онно олоҕу олоро, кэргэннэнэ да илик 18-20 саастаах оҕолор сэриилэһэ сылдьаллар. Оттон мин кэннибэр хаалларар уолаттардаахпын» диэбитэ», - диэн аҕа барахсан долгуйан туран тыл эттэ.
Дмитрий Николаевич Егоров 1975 сыл тохсунньу 27 күнүгэр Сунтаар улууһун Тойбохой сэлиэнньэтигэр үһүс оҕонон төрөөбүт. 1991 с. Арыылаах орто оскуолатын бүтэрбит. 1993 – 1994 сс. Чита уобалаһын Борзя куоратыгар РФ Сэбилэниилээх күүстэрин кэккэтигэр тааҥкабай чааска сулууспалаабыт. Икки оскуолаҕа үөрэнэр оҕолоох. 2023 с. «За укрепление боевого содружества» мэтээлинэн наҕараадаламмыт.
Сонун төрдө: СӨ Бырабыыталыстыбатын уонна Ил Дарханын пресс-сулууспата
