Алтынньы 9 күнүгэр Саха Ѳрѳспүүбүлүкэтин сокуоннарын нууччалыы уонна сахалыы тиэкистэрэ сѳп түбэсиhиилэрин ситиһиигэ Ил Түмэн хамыыhыйатын бастакы мунньаҕа буолла.
Хамыыhыйа бэрэссэдээтэлэ Александр Жирков тиэкистэр сѳп түбэсиhиилэрин көрөр хамыыhыйа үлэтигэр урукку ирдэбиллэр хаалбыттарын туhунан биллэрдэ. Кини тиэкистэр сѳп түбэсиhиилэрин ситиһиигэ хамыыhыйа үлэтэ улахан суолталааҕын бэлиэтээтэ.
Мунньахха СѲ сокуоннарын нууччалыы уонна сахалыы тиэкистэрэ сѳп түбэсиhиилэрин ситиһиигэ хамыыhыйа бэрэссэдээтэлин солбуйааччыта Алёна Атласова, хамыыhыйа чилиэнэ Андрей Находкин уонна хамыыhыйа сэкирэтээрэ Мария Илларионова кытыннылар.
Санаттахха, ѳрѳспүүбүлүкэ парламенын бастакы пленарнай мунньаҕар Саха Ѳрѳспүүбүлүкэтин сокуоннарын сахалыы уонна нууччалыы тиэкистэрэ сѳп түбэсиhиилэрин ситиһиигэ Ил Түмэҥҥэ хамыыhыйа тэрийэр туhунан Уураах ылыллыбыта.
Хамыыhыйа Саха Сирин сокуоннарын тиэкистэрин нууччалыы-сахалыы тылбааһыгар араастаhыылары уонна сѳп түбэспэт буолуулары туоратар сыаллаах тэриллибитэ. Хамыыhыйа ѳрѳспүүбүлүкэ сокуоннарын тылбааhа төрүт тиэкиһи кытта тэҥ суолталаах буоларын кѳрүѳҕэ, итиэннэ кѳҥүл тылбааһы утарар миэрэлэри ылыныар буолуоҕа.
Сонун төрдө: Ил Түмэн пресс-сулууспата.
