Алтынньы 12 күнүгэр Ил Дархан Айсен Николаев Арктика куораттарын уонна нэһилиэнньэлээх пууннарын сайыннарыы боппуруостарынан дьарыктанар ыстаап бастакы мунньаҕар кытынна. Ыстаап үлэтин РФ Арктиканы уонна Уһук Илини сайыннарыы миниистирэ Алексей Чекунков салайар.
Мунньахха Тиксии бөһүөлэги уонна Найба сэлиэнньэтин тирэх пууннар ахсааннарыгар киллэрэр туһунан кэпсэттилэр. Хотугу байҕал суолун сайыннарыы тосхолунан Арктикаҕа федеральнай суолталаах тирэх пууннар ситимнэрин тэрийии бэрэсидьиэн Владимир Путин сорудаҕынан ыытыллар. Тирэх пууннары тэрийии барылыгар Булун оройуонун Тиксии бөһүөлэгин, ол иһигэр Найба сэлиэнньэтин, агломерацията киирбитэ. Манна дириҥ уулаах байҕал пуордун тутуохтаахтар.
Миниистир хас биирдии тирэх пуун 2035 сылга диэри социальнай-экэнэмиичэскэй сайдыытын барыла оҥоһуллуо, үбүлээһинэ чопчуланыа диэн иһитиннэрдэ. Мунньах түмүгүнэн СӨ экэниэмикэтин миниистирэ Петр Поповка Тиксии бөһүөлэк сайдыытын маастар-былаанын РФ Арктиканы уонна Уһук Илини сайыннарыы министиэристибэтигэр ыытарга сорудах биэрдилэр. Маны сэргэ, Найба сэлиэнньэтин маастар-былаана оҥоһуллуохтааҕын эттилэр.
Санаттахха, Тиксии пуордун тас дойду суудуналара тохтуур аһаҕас пуортарын ахсааныгар киллэрбиттэрэ.
