Киир

Киир

Алтынньы 16 күнүгэр СӨ Бырабыыталыстыбатын бэрэссэдээтэлин солбуйааччы Георгий Степанов брифиҥҥэ, РФ Бырабыыталыстыбатын саҥа уурааҕынан, анал байыаннай эпэрээссийэ (АБДь) кыттыылаахтарын үлэҕэ ылбыт тэрилтэлэр судаарыстыбаттан чэпчэтиилээх субсидия ылыахтарын сөбүн туһунан кэпсээтэ.

Кини субсидия тэрилтэлэргэ РФ Социальнай пуондатыттан бэриллэр диэн эттэ. Ол кэннэ өрөспүүбүүлүкэ тэрилтэлэрин АБДь кыттыылаахтарын үлэҕэ ыларга ыҥырда.

Георгий Степанов салгыы Саха сиригэр АБДь кыттыылаахтарыгар уонна кинилэр дьиэ кэргэннэригэр төһө социальнай өйөбүл оҥоһулларын эттэ. Ол курдук, 52 ыал чааһынай  дьиэлэригэр гаас киллэрэллэригэр, байыаннай сулууспалаахтар 134 төрөппүттэрэ санаторийга эбэтэр курортка сынньана барар путевкаларыгар, 177 киһи буойун аймахтара эмтэнэр сиригэр барарга көмө ылбыттар.

Бааһырбыт байыастар өрөспүүбүүлүкэ доруобуйатын харыстабылын уонна социальнай хааччыйыыга тэрилтэлэригэр доруобуйаларын көннөрөр реабилитацияны бараллар. Бу өҥөнөн барыта 328 байыас уонна 591 байыаннай сулууспалаах дьиэ кэргэннэрэ туһаммыттар.

Бүгүн АБДь кыттыылаахтарын уонна кинилэр дьиэ кэргэннэрин өйүүр биир сүрүн хайысха - кинилэр үлэлээх буолууларын ситиһии.

Өрөспүүбүлүкэ үлэнэн хааччыйар кииннэригэр 217 киһи үлэ көрдөөн учуокка турбут. Олортон 65-һэ быһаччы АБДь кыттылаахтара, 152 кинилэр дьиэ кэргэттэрин бэрэстэбиитэллэрэ эбит.

Тустаах үлэ ыытыллыбытын кэннэ 66 киһи саҥа идэни ылыы үөрэҕэр ыытыллыбыт, 114 киһи үлэҕэ киирбит.

Бэйэ кэрр.

Санааҕын суруй

Бүтэһик сонуннар