Ил Түмэҥҥэ «Патриотизм в условиях специальной военной операции: опыт, проблемы, перспективы» төгүрүк остуол буолан ааста.
Кэпсэтиини икки сис кэмитиэт: Александр Подголов бэрэссэдээтэллээх Байыаннай сулууспалаахтар, бойобуой дьайыылар кыттыылаахтарын, патриотическай иитии уонна уопсастыбаннай тэрилтэлэр боппуруостарыгар кэмитиэт уонна Георгий Балакшин бэрэссэдээтэллээх Ыччат уонна физическэй култуура кэмитиэтэ тэрийдилэр. Тэрээһиҥҥэ 120 тахса киһи кэлэн уонна тэйиччиттэн кытынна.
Манна даҕатан, Саха сирэ 2022 с. РФ регионнарыттан бастакынан «Саха Өрөспүүбүлүкэтигэр патриотическай иитии туһунан» сокуону ылыммытын бэлиэтээтилэр. Ыччат бэлиитикэтин судаарыстыбаннай тосхолунан патриотическай хайысхалаах тэрээһин тиһигин СӨ Ыччат уонна социальнай коммуникациялар дьыалаларыгар министиэристибэтэ олоххо киллэрэр.
Министиэристибэ дааннайынан, өрөспүүбүлүкэҕэ 14-тэн 35 диэри саастаах 314 606 киһи олорор. Бу сылга «Саха сирин ыччата» тосхолунан өрөспүүбүлүкэ бүддьүөтүттэн 50 мөл. солк. кээмэйдээх субсидия бэриллибит. Миниистир Петр Шамаев иһитиннэрбитинэн, субсидия ыччат бэлиитикэтин уонна патриотическай иитии 10 хайысхатынан бэриллэр.
Патриотическай иитиигэ көхтөөх үлэни 289 байыаннай-патриотическай кулууп (12 тыһ. оҕолоох), 218 юнармейскай этэрээт (7750 юнармеецтаах), 11 көрдүүр этэрээт, 7 кадеттар кылаастара, 4 казактар кылаастара ыыталлар.
Төгүрүк остуол кыттааччылара салгыы СВО кыттыылаахтарын кытта үлэ, кинилэр дьиэ кэргэннэригэр көмө, охтубут байыастар ааттарын үйэтитии туһунан кэпсэттилэр. Төгүрүк остуол үлэтин түмүгүнэн кэккэ этиилэри ылыннылар.
Сонун төрдө: Ил Түмэн пресс-сулууспата.
