Саха худуоһунньуга Семен Луканси Москуба ВДНХ уораҕайыгар сэтинньи 12 күнүгэр ыытыллыбыт Саха сирин күнүгэр кини уруһуйдаабыт үлэлэрин көҥүлэ суох туһаммыттарын туһунан тус ситимигэр суруйда. Ол курдук, Норуоттар икки ардыларынааҕы «Арассыыйа» быыстапка-пуорумҥа ыытыллыбыт сахалыы уруу сиэрин-туомун ыытыыга кини уруһуйдарын, cүктэр кыыс уонна күтүөт уол курдук оҥорон, декорация быһыытынан туруорбуттар.
Худуоһунньук этэринэн, кини үлэлэрин көҥүлэ суох туһаммыттарын таһынан, уларытыы киллэрэн ис хоһооннорун «токурутан» кэбиспиттэр:
«Икки атын-атын суолталаах үлэбин биир үлэ курдук холбоон кэбиспиттэр. «Тыгын Дархаммын» хааннаах батаһын сотон баран күтүөт гыммыттар. Киһи үлэтин хайдах маннык көҥүлэ суох туттуохха сөбүн өйүм хоппот. Бас-баттах уонна кэрээнэ суох быһыы диэн сыаналыыбын. Бу тэрийээччилэр, дизайнердар уонна маны ылыммыт министиэристибэ итэҕэһэ буолар. Сокуону билбэттэрин, айымньы ааптара уонна интеллектуальнай бас билии диэн тугун өйдөөбөттөрүн көрдөрдүлэр диэххэ сөп", - диэн кини хомолтотун биллэрбит.
Сонун төрдө: https://sakhaday.ru
