Сэтинньи 15 күнүгэр И.С. Жараев аатынан СӨ Аудиовизуальнай нэһилиэстибэтин национальнай киинэ уонна «Якутская ссылка» түмэл-дьиэ Саха сирин бастакы идэлээх киинэ уһулааччыта Никандр Саввинов төрөөбүтэ 90 сылыгар аналлаах тэрээһин ыыттылар.
Никандр Егорович Саха сирин кинематограба үөскүүрүгэр уонна сайдарыгар сүҥкэн үтүөлээх. Киин пуондатыгар кини уһулбут баай архыыба хараллан сытар. Н.Е. Саввинов Он «Восточная Сибирь», «Новости дня», «Пионерия» сурунаалларга анаан 500 тахса хроникалаах сюжеты уонна 20 тахса документальнай киинэни уһулбута. Маны сэргэ өрөспүүбүлүкэ хаһыаттарыгар уонна сурунаалларыгар элбэх ахсааннаах репортаж, ыстатыйа, уочарка ааптара.
Арктикатааҕы судаарыстыбаннай култуура уонна ускуустуба институтун «Киинэни, устуудьуйаны, хаартысканан уонна видеонан айар үлэни салайыы» хайысхатын устудьуоннарын Никандр Саввинов айар үлэтин, илиинэн суруллубут куурус уонна дьупулуом үлэлэрин, киинэҕэ анаан оҥорбут уруһуйдарын, уһулуу кэмигэр түһэрбит хаартыскаларын билиһиннэрдилэр уонна «Саха кинематограбын раритеттара» быыстапканы көрдөрдүлэр.
Тэрээһин бочуоттаах ыалдьытынан Никандр Егорович кыыһа Светлана Саввинова (Громова) буолла. Кини аҕатын айар суола хайдах тэлиллибитин кэпсээтэ. Маны сэргэ тэрээһиҥҥэ 1967 сыллаахха биллиилээх эпэрээтэр бэйэтэ уһулбут «Искусство страны Олонхо» киинэтин СССР саҕанааҕы проекторга көрдөрдүлэр.
Киинэ кэннэ устудьуоннар дискуссияҕа кытыннылар, тугу көрбүттэрин кэпсэттилэр. Светлана Никандровна кинилэргэ идэҕэ уонна айар үлэҕэ бэриниилээх буоларга баҕарда.
Сонун төрдө: И.С. Жараев аатынан СӨ Аудиовизуальнай нэһилиэстибэтин национальнай киинэ
