Соторутааҕыта Чайаҥдаҕа тыатааҕы үлэһиттэргэ саба түһэр видеота тарҕаммыта. Дьиҥэр, сиэмэх кыыл бу сиргэ сылдьыбыта эрдэ биллибит уонна сөптөөх миэрэ тута ылыллыбыт эбит. Ол туһунан бэҕэһээ СӨ Экология министиэристибэтин Булт хаһаайыстыбатын уонна ураты харыстанар сирдэрин департамена иһитиннэрдэ.
Онно суруллубутунан, Ленскэйдээҕи судаарыстыбаннай иниспиэктэр Е.И. Иванов алтынньы 30 күнүнээҕи араапарыгар олоҕуран кыылы суох гынарга быһаарыы таһаарбыттар уонна Чайаҥдатааҕы НГКМ үлэһиттэрэ олорор сирдэригэр булчут О.В. Крайновка сэтинньи 2 күнүттэн 4 күнүгэр диэри эһэни бултуурга көҥүл биэрбиттэр.
Тыатааҕы эрдэ бултанан хаалыахтааҕын, Чайаҥдатааҕы НГКМ харабыла көҥүллээх булчуту бэйэтин сиригэр киллэрбэтэх. Ол түмүгэр, сэтинньи 10 күнүгэр эһэ икки киһиэхэ саба түспүт. Ону ытарга күһэллибиттэр. Быһылаан кэннэ, судаарыстыбаннай иниспиэктэр Е.И. Иванов сэтинньи 13 күнүнээҕи араапарынан, «РусГазБурение» ХЭТ үлэһиттэригэр кутталы үөскэтэр өссө биир эһэни бултуурга көҥүл бэриллибит.
Чайаҥдатааҕы ГНКМ булчуту киллэрбэтэҕин таһынан, үлэһиттэр олорор сирдэрин бүтэйдээбэтэх, ас тобоҕун уонна бөҕү кутарга сөптөөх усулуобуйаны тэрийбэтэх курдук. Оттон эһэлэр дьон олорор сиригэр аһылык сытын ылан кэлбит буолуохтарын сөп. Эмсэҕэлээбит үлэһиттэр билигин Москуба балыыһатыгар эмтэнэ сыталлар, туруктара үчүгэй. «Тэрилтэбит олус көмөлөстө» диэн махтанар сурахтара иһиллэр...
Бэйэ кэр.
