Бастакы Бэрэсидьиэммит Михаил Николаев суох буолуоҕуттан уопсастыбаннас кини аатын хайдах үйэтитэр суолу тобулар. Биллэн турар, бар дьон дойдубут, омукпут, ыччаппыт дьоллоох тускутун туһугар олорбут сүҥкэн үтүөлээх киһибит аатын киин куорат бастыҥ уулуссатыгар иҥэриэн, мэҥэ тааһын киин куорат бастыҥ туонатыгар туруоруон баҕарар. Ол да иһин, Бастакы Бэрэсидьиэн аатын Поярков уулуссатыгар, Үүнэр көлүөнэ пааркатыгар иҥэрэр, мэҥэ тааһын онно туруорар этиилэр үгүс өйөбүлү ылбыттара. Бу этиилэр үрдүкү салалтаҕа тиийбэтэх буолуохтарын сатаммат.
Ону баара, Ил Дархан Айсен Николаев сэтинньи 13 күнүнээҕи «СӨ Бастакы Бэрэсидьиэнэ М.Е. Николаев аатын үйэтитии туһунан» Ыйааҕар Автодорожнай уулуссаны М.Е. Николаев аатынан проспекка уларытыы, мэҥэ тааһын Киин уокурукка туруоруу боппуруостарын үөрэтэн олоххо киллэрэр туһунан пууннар киирдилэр. Ону толорууга тута Дьокуускай куорат уокуруктааҕы дьаһалтатыгар баһылыга Евгений Григорьев салайыытынан үлэлиир хамыыһыйа тэрилиннэ. Манна даҕатан, бу боппуруостары Дьокуускай куорат дууматын биэдэмистибэлэр икки ардыларынааҕы хамыыйыһата быһаарарын чопчулуубут. Ол эбэтэр быһарыы тахсыар диэри уопсастыбаннас бу боппуруоска кыттыһыан, дьүүллэһиэн сөп диэххэ дуу...
Санатар буоллахха, Бастакы Бэрэсидьиэн Михаил Николаев аатын Автодорожнай уулуссаҕа иҥэрэн эрэллэрин туһунан сонун тарҕанаатын кытары, уопсастыбаннас ортотугар улахан мөккүөр тахсыбыта, сорох социальнай ситимнэр хабан ылан дьон санаатын үөрэтэн барбыттара. Сорохтор бачча сүдү киһи аатын өрүү кыһалҕалаах, быыллаах, харан туруулаах куһаҕан уулуссаҕа биэрэллэрин утарбыттара, Михаил Ефимовичка «ытыктабыла суох сыһыан, кини лиичинэһин намтатыы, аанньа ахтыбат буолуу» курдук сыаналаабыттара, оттон сорохтор «Михаил Николаев аатын ылбыт уулусса хата түргэнник оҥоһуллуо, тупсуо киэркэйиэ» диэн үөрэ-көтө өйөөбүттэрэ.
Холобура, «Открытая социология Саха» ыыппыт ыйытыгар 422 киһи куоластаабыт. Автодорожнай уулуссаҕа М.Е.Николаев аатын иҥэриини өйүүр дьон ахсаана утарар дьон ахсаанын баһыйбыт. Ол эрээри кэмэнтээрийдээччилэр бары кэриэтэ бу быһаарыыны утаран, Михаил Николаев аатын Поярков уулуссатыгар иҥэрэр сөптөөҕүн суруйбуттар. Оттон биһиги медиа-бөлөхпүт https://yakutia24.ru сүрүн эрэдээктэрэ «бу 6 килэмиэтирдээх Автодорожнай уулуссаны сайыннарыыга саамай сөптөөх быһаарыы уонна бастакы хардыы» диэн суруйбута. Кини бу уулусса киэҥин-куоҥун, элбэх саҥа тутууну батарар кыахтааҕын уонна түргэнник сайдар кыахтааҕын ыйбыта.
Билигин Дьокуускай куорат дьаһалтата уонна Дуумата Ил Дархан этиитин хайаан да киллэрэргэ ылсан үлэлии сылдьаллар. Ол курдук, Ил Түмэҥҥэ Автодорожнай уулусса дьокутаата Светлана Давыдова, икки дьахтар сүбэтин бэрэстэбиитэлэ бу этиини өйүүллэрин туһунан сонуннар киэҥ эйгэҕэ таҕыстылар. Дьиҥэр, кинилэр маннык санаалаахтара кими да соһуппат. Үрдүкү салалтаҕа чугас дьон буоллахтара.
Оттон биһиги киин куорат эйгэтин уларытыы-тэлэритии, саҥа тутуулары ыытыы боппуруостарыгар көннөрү дьон, олохтоохтор санааларын хаһан учуоттуур буолалларын күүтэбит. Маннык быһаарыылар киэҥ эйгэҕэ дьүүллэһии, дьон санаатын үөрэтии кэннэ ылыллыахтаахтар диэн санааны тутуһабыт. Ол иһин эһигиттэн ыйытабыт: Михаил Николаев аатын Автодорожнай уулуссаҕа иҥэриини сөбүлэһэҕит дуу, утараҕыт дуу?
Бэйэ кэр.
