Өрөспүүбүлүкэ салалтата Стратегическай көҕүлээһин ааҕыныстыбатын (АСИ) кытта сөбүлэҥ түһэристэ. Манна пилота суох көтөр аппараттары оҥорон таһаарар технопарканы тэрийии туһунан этиллэр. РФ бырамыысылыннас уонна эргиэн министиэристибэтигэр сайаапка ыыттыбыт диэн СӨ Бырабыыталыстыбатын бэрэссэдээтэлин солбуйааччыта Анатолий Семенов «Сыыпара алмааһа» форумҥа биллэрдэ.
«Аччыгый билим-оҥорон таһаарыы киинин 2025 сылга тэрийэргэ сайаапка ыыттыбыт. Манна дроннары хомуйар тэриллэр туруохтара. Ол эбэтэр технопарк диэн буолар. РФ Бырабыыталыстыбатын дьаһала баар. Онон кэлэр сылга быһаарыллар кыахтаах. Билигин биһиэхэ «Сахадрон» хампаанньа үлэлиир. Манна хайыы үйэ 500 FPV-дрону хомуйдулар», - диэн вице-премьер быһаарда.
Кини этэринэн, Арассыыйа кэлэр биэс сыл иһигэр тас дойдуттан кэлэр саппаас чаастары бэйэтэ оҥорон таһаарар кыахтаах. Оттон Саха сиригэр дроннары туһаныы кэскилэ киэҥ. Холобура, ойуур баһаарын кэтэбилигэр. Былырыын Хандыгаҕа 18 чаас көтөр БПЛА тургутан көрбүттэр. Онон Анатолий Семенов ыччаты оскуолаттан саҕалаан БПЛА хомуйан таһаарарга уонна туһанарга үөрэтэн саҕалыырга этии киллэрдэ.
Сонун төрдө: «Сыыппара алмааһа» форум телеграм-ханаала
