ВДНХ 75-с павильонугар «Якутия - вселенная Олонхо» истиэндэҕэ сэтинньи 28-30 күннэригэр СӨ Аан дойду норуоттарын хомуһун түмэлин уонна киинин билим пуондатыттан 40 малы туруордулар. Быыстапка Саха сиригэр Хомус күнүгэр ананан үлэлээтэ.
Өрөспүүбүлүкэ экспозициятыгар уонна варган быыстапкатыгар РФ Уһук Илини уонна Арктиканы сайыннарыыга миниистирэ Алексей Чекунков уонна сенатор РФ Галина Карелова сырыттылар. Тэрийэччилэр этэллэринэн, ыалдьыттар болҕомтолорун ордук аан дойду таһымнаах уус Реворий Чемчоев «Олень» хомуһа ылбыт. Үстүрүмүөн 2011 сыллаахха космонавт Олег Кононенконы кытта куйаарга 200 хонук кэриҥэ сылдьыбыта.
Эдэр уус Спиридон Иванов саха төрүт хомуһун илиинэн таптайыы ньыматын көрдөрдө. Хомуһу тардыыга маастар-кылааһы аан дойдутааҕы виртуоз-хомусчуттар Варвара Степанова-Арчыына, Нарияна Ренанто ыыттылар. Маны сэргэ Хомус күнүгэр аналлаах үөрүүлээх кэнсиэр буолла. Тэрээһини хомус оһуохайынан түмүктээтилэр.
Сонун төрдө: СӨ Бырабыыталыстыбатын уонна Ил Дарханын пресс-сулууспата
