Саха урбаанньыта, биилээх оҥоһуктарга норуоттар икки ардыларынааҕы быыстапкалар хас да төгүллээх кыайыылааҕа уонна бириискэ тиксээччитэ Александр Васильев-Байдам Уус аан бастакытын саха быһахтарын Казахстаҥҥа таһааран атыылыырга хантараак түһэристэ. Саха сиригэр бу бастакы уопут буолар.
Александр Васильев удьуор уус, норуот ойуулуур-дьүһүннүүр оҥоһуктарын маастара, дьупулуомнаах худуоһунньук уонна ювелир-монтировщик, СӨ Тимир уустарын сойууһун уонна «Сделано в Якутии» урбаанньыттар ассоциацияларын чилиэнэ. Саха быһаҕын оҥоруунан 15 сыл устата дьарыктанар.
«Быйыл саас өрөспүүбүлүкэ Экспорды өйүүр киинин өйөбүлүнэн Казахстан Астана куоратыгар тиийбиппит. Сырыы түмүгэр улахан хампаанньаны кытта хантараак түһэрсибиппит уонна дьоҕус тэрилтэлэри кытта оҥоһуктарбытын атыылаһан ылалларыгар кэпсэппиппит. Хантараак баттаныллыаҕыттан Казахстаҥҥа 300 тыһ. солк. сууммалаах 45 быһаҕы ыыттыбыт. Маны таһынан, партнердарбыт биһиги оҥорор харысхалларбытын уонна ымыыларбытын сэргээн эрэллэр », — диэн Александр Васильев кэпсээтэ.
Урбанньыт тус дьыалатын сайыннарыыга үгүс сыратын уонна үбүн ыытан кэллэ. Урут сыаҕын куортамнаһан үлэлэппит буоллаҕына, билигин бэйэтэ бас билэр кыра сыахтаах. Сотору кэминэн атын маастардары кытта оҥорон таһаарыыны улаатыннаран, салгыы тас дойдулары кытта үлэлэһиини кэҥэтэр санаалаах.
Сонун төрдө: «СӨ Экспорды өйүүр киинэ»
