Дьокуускай куорат Губин уулуссатыгар турар «Богатырь» атыы-эргиэн киинин хаһаайынын тутууну үс ый иһигэр көтүрэргэ модьуйдулар. Бу дьиэ тутуу бары ирдэбилин кэһэн туран тутуллубута биллибит. Ол курдук, киин куорат уокуруктааҕы дьаһалтатын хамыыһыйата урбаанньыкка сир бэриллибэтэҕин, ону ааһан бу сир маннык эбийиэк тутулларыгар сөбө суоҕун, тутуу көҥүлэ суох барбытын быһаарда.
Эбиитин бу дьиэҕэ үлэлиир «наливайкалар» дьон олоҕун буортулууллар эбит. Олохтоохтор манна күнүстэри-түүннэри арыгы атыыланарын, онтон сылтаан араас түктэри быһыы, буруйу оҥоруу тахсарын элбэхтик үҥсүбүттэр.
Билигин бу көҥүлэ суох тутуллубут дьиэҕэ барыта холбоон 700 кв.м. иэннээх миэстэлэри атыылыыбыт диэн биллэриилэр тахса туралларын, 1 миэтэрэтигэр 70 000 ₽ көрдүүллэрин «Эхо столицы» хаһыат эрэдээксийэтэ бэлиэтиир. Манан хаһаайын «кыһалҕатын» харчыга кубулутан баран атын дьоҥҥо сүктэрэ сатыы сылдьарын сэрэйиэххэ сөп.
Оттон биһиги бу атыы-эргиэн киинэ хаһан, хайдах, ким өйөбүлүнэн тутуллубутун билиэхпитин баҕарабыт. Оччотооҕу киин куорат дьаһалтата ама билбэккэ хааллаҕай?
Сонун төрдө: "Эхо столицы"
