Киин куорат оскуолаларын үөрэнээччилэрин менютугар чэгиэн фастфуд киирдэ. Оҕолор сөбүлээн сиир бургердарын сөпкө аһааһын (ПП) ирдиир ньымаларынан астыыр буоллулар.
Саҥа саҕалааһыны Н.И. Шарин аатынан 39 №-дээх оскуолатыгар, Дьокуускай куораттааҕы лиссиэйигэр уонна Ф.И. Авдеева аатынан Оҕо айымньытын дыбарыаһыгар эрэ киллэрдилэр. Бу үөрэх кыһаларыгар аһатыы эпэрээтэринэн Дьокуускайдааҕы ресурснай хааччыйыы киинэ (ЦРО) буолар.
“Аныгы оҕолор фастфуду көннөрү аһылыктааҕар ордороллорун бары билэбит. Ол иһин биһиги оскуола остолобуойун менютугар чэгиэн бургеры киллэрэргэ санаммыппыт. “Школьник” бургеры оҕолор олус сөбүлээтилэр. Манна оҕо аһылыгар көрүллэр ирдэбил барыта тутуһуллар. Ынах этиттэн кэтилиэти, арыыга буолбакка, паарга буһарабыт. Ол-бу амтаны тупсарар эттиктэри, тумалары куппаппыт. Соуһугар майонез оннугар убаҕас сүөгэйи туттабыт”, - диэн Ресурснай хааччыйыы киинин сүрүн технолога Анастасия Боярская кэпсээтэ.
Бургеры таһынан үөрэнээччилэргэ балык кэтилиэттээх фишбургердары, бурдук оннугар эбиэс көмнөҕүттэн эбэтэр иэдьэгэйтэн оҕуруот аһа истээх ПП-пиццаны, диетическэй наггетсалары астаан аһатыахтара.
Сонун төрдө: Дьокуускайдааҕы ресурснай хааччыйыы киинэ
