Ахсынньы 14 күнүгэр «Аэрофлот» Уһук Илин олохтооторугар судаарыстыбаттан субсидиялаах билиэт атыытын саҕалаата. Тохсунньуга көтөр билиэт хайыы сахха бүппүт сурахтаах.
Анал тарыыптар «Аэрофлот», «Россия» уонна «Аврора» хампаанньалар быһа эриэйсэлэригэр SU кодунан экэниэмийэлиир кылаас өҥөтүгэр бэриллэллэр. Субсидиялаах тарыыбынан билиэттэри тэйиччиттэн «Аэрофлот» саайтыгар уурдарыахха эбэтэр атыылаһан ылыахха сөп. Уурдарыы болдьоҕо – 7 күн.
Дьокуускайтан Москубаҕа субсидиялаах билиэт сыаната улахан киһиэхэ - 9 200 солк., оҕоҕо - 5 200 солк. буолар. Гражданнар сорох категорияларыгар итинтэн чэпчэки сыаналаах анал тарыыптар бааллар. Маны 23 диэри саастаах эдэр дьон, 60 үөһэ саастаах (дьахталларга — 55 үөһэ) аҕам дьон, I бөлөххө киирэр инбэлииттэр, оҕо эрдэхтэн II уонна III бөлөххө киирэр инбэлииттэр, I бөлөххө киирэр инбэлиити арыаллааччылар, элбэх оҕолоохтор туһаныахтарын сөп.
Сонун төрдө: «Аэрофлот» хампаанньа
