Ахсынньы 6 күнүгэр “Алмаасэргиэнбаан” АУо АКБ бэлиэ суолталаах түгэни – 30 сыллаах үбүлүөйүн – үөрүүлээх быһыыга-майгыга бэлиэтээтэ. “Алмаасэргиэнбаан” отут сыл устата тус суолун-ииһин солоон үүнүү-сайдыы аартыгын тэллэ, билигин Саха сиригэр эрэгийиэн таһымнаах соҕотох баанынан буолар.
Күн бүгүн биһиги “Алмаасэргиэнбааны” өрөспүүбүлүкэ нэһилиэнньэтигэр уонна урбааныгар хаачыстыбалаах бородуукталары, өҥөнү оҥорор үрдүк кэмпитиэнсийэ киинэ буолар диэн, киэн тутта эрэллээхтик этэбит. Отут сыллаах кэрдиис кэми баан үрдүк көрдөрүүлээх көрсөр. Баан бородуукталара, өҥөлөрө ырыынакка федеральнай таһымнаах бааннары кытта тэҥ-тэҥҥэ күрэстэһэр. “Саха сирин олохтооҕун каартата” сүрүн бородууктата быйыл алтынньыга FINOPOLIS үп-харчы инновационнай технологияларын пуорумугар үрдүктүк сыаналаммыта.
Баан үбэ-харчыта бигэ туруктааҕын эриэйтиннээх икки ааҕыныстыба – “Эксперт РА” уонна “Национальное Рейтинговое Агентство” – бигэргэттилэр. Маны таһынан ахсынньы 6 күнүгэр, Баан төрөөбүт күнүгэр, дьоһун бэлэҕи – “Эксперт РА” ааҕыныстыбаттан ESG-эриэйтини – тутта.
Волонтёрдааһын, успуорт уонна социальнай эппиэттээх буолуу Баан кэрпэрэтиибинэй култууратын быстыспат чааһа буолар. Успуорду, чөл олоҕу мэлдьи өйүүр, үгүс сыллар усталарыгар Саха Өрөспүүбүлүкэтин Үҥкүү успуордун сойууһун уонна уус-уран гимнастикатын федерациятын үпкэ-харчыга генеральнай партнёра буолар, күүс (борьба) успуордун федерациятын эмиэ өйүүр. Өрөспүүбүлүкэ, дойду уонна норуоттар икки ардыларынааҕы таһымнаах бөдөҥ успуорт тэрээһиннэрин, марафон, бэлисэпиэтинэн сүүрдүү успуонсара буолар.
Бу сыл сэтинньитигэр “Алмаасэргиэнбаан” Саха сирин бааннарын үлэһиттэрин ортолоругар ыытыллыбыт “Банкиада-2023” чөмпүйэнээккэ аан маҥнай муҥутуур кыайыылааҕынан ааттанна. Сыл аҥаарын устата сэттэ хамаанда успуорт уон көрүҥэр илин-кэлин түһүстүлэр. Дуобат, саахымат, остуол тиэнниһэ, мини-футбол, стритбол, буулдьа саанан ытыы, дартс, харбааһын, СS:GO уонна волейбол күрэхтэригэр кыайыылаах тахсар иһин бары сыраларын-сылбаларын ууран кииристилэр. Баан хамаандата, 88 очукуолаах рекортаах баалы ылан, түһүмэхтэргэ эрэллээхтик бастаата. Бу – бүтүн кэлэктиип дьоһун ситиһиитэ!
2023 сылга “Алмаасэргиэнбаан” “Өрөспүүбүлүкэтээҕи 1-кы №-дээх балыыһа – М.Е. Николаев аатынан Национальнай мэдиссиинэ киинэ” СӨ ГАУ Педиатрия киинин онкологическай отделениетын кытта бииргэ үлэлэспитэ төгүрүк 15 сыла буолла. Сыл аайы Баан Мэдиссиинэ национальнай киинигэр араас тэрили, миэбэли атыылаһарга көмөлөһөр, искэн ыарыылаах оҕолор анаалыстарын федеральнай лабаратыарыйаларга тиэрдэргэ элбэх боппуруоһу быһаарар. Өрөспүүбүлүкэ баана искэн ыарыылаах оҕолор Өрөспүүбүлүкэ 1-кы №-дээх балыыһатын онкологическай отделениетыгар эмтэнэр кэмнэригэр төрөппүттэрэ гостиницаҕа олорор ороскуоттарын төлүүр. Бу ыытыллар үлэлэр көмөлөрүнэн 300 кэриҥэ оҕо уодаһыннаах ыарыыттан эмтэнэригэр күүс буолла.
“Алмаасэргиэнбаан” төрөөбүт күнүгэр үгэс быһыытынан бэлэх туттарар. Искэн ыарыылаах оҕолорго баҕа өттүнэн материальнай көмөнү оҥорор үтүө санаа аахсыйатын тэрийэр. Хайҕаллааҕа диэн, аахсыйа сылтан сыл кэҥээн, көмө кээмэйэ улаатан иһэр.
Бу бэлиэ суолталаах сылга Баан нэһилиэнньэни үөрэтиигэ улахан болҕомтотун уурда. Билии хас биирдии киһиэхэ бараммат баай, бигэ хапытаал буолара саарбахтаммат.
Ахсынньы 1 күнүгэр Дьокуускайга кыһын "Almaz Business Conf” кэмпириэнсийэттэн саҕаланна. Манна ыҥырыылаах спикерэ Арассыыйа уонна СНГ сүрүн маркетолог-быраактыга Игорь Манн буолла. Тренинг кыттыылаахтара урбаан чыпчаалын дабайарга сыаналаах билиини уонна мотивацияны ыллылар.
Аныгы кэм өҥөнү туһанааччыта (потребитель) олох саҥа сүүрээннэрин кытта тэҥҥэ хаамсар, ирдэбиллээх уонна билиилээх-көрүүлээх буолла. Килийиэннэр, үлэһиттэр бородууктаны, өҥөнү эрэ буолбакка, хампаанньа сыаннастарын, бириинсиптэрин тэҥҥэ үллэстэллэр. Уопсастыбаҕа, тулалыыр эйгэҕэ уонна үлэһиттэргэ бигэ тиһиктээх сайдыы, эппиэтинэстээх, кыһамньылаах сыһыан – өҥөнү туһанааччылар аныгы брендэлэргэ көрдүүр бириинсиптэрэ. “Алмаасэргиэнбаан”, бу бириинсиптэри тутуһан, үлэтигэр-хамнаһыгар сайдыы саҥа сүүрээннэрин бигэтик киллэрэн, өрөспүүбүлүкэҕэ биир бастыҥ көрдөрүүлээх хампаанньа буолла.
Ахсынньы 14 күнүгэр “Алмаасэргиэнбаан” “Социальный капитал бизнеса и экономика доверия” диэн тиһиктээх бигэ сайдыыга анаммыт кэмпириэнсийэтин үһүс төгүлүн тэрийэр. Манна эспиэрдэр тиһиктээх бигэ сайдыы саҥа быраактыкаларын уонна ньымаларын билиэхтэрэ. Пуорум түмүгүнэн Саха сирин эппиэтинэстээх хампаанньаларыгар өйөбүл оҥоһуллуо.
Айылҕаны харыстааһын, уопсастыба үүнүүтэ-сайдыыта, уопсастыбаҕа эрэллээх сыһыан – “Алмаасэргиэнбаан” сайдар, саҥа таһымҥа тахсар, өрө тутар хайысхалара.
Үп-харчы өттүнэн бигэ тирэхтээх буолуу уонна хаачыстыбалаах өҥөлөрү оҥоруу – Баан хамаандатын, идэлэригэр бэриниилээх профессионалларын үлэлэрин уопсай түмүгэ. Итиэннэ, биллэн турар, килийиэннэрбит, партнёрдарбыт сүрүн күүс буолан, бастыҥтан бастыҥ буоларга дьулуһабыт, инникибит диэки эрэллээхтик хардыылыыбыт!
