«Ыраас Арктика» бырайыак үлэтин түмүгэр Саха сиригэр 2021 сылтан 2023 сылга диэри 850 туонна кэриҥэ металлолом хомулунна, 31 га иэннээх сир ыраастанна. Манна 300 тахса волонтер кытынна. Ол туһунан ахсынньы 18 күнүгэр СӨ Арктиканы сайыннарыы уонна Хоту сир норуоттар дьыалаларын министиирин бастакы солбуйааччыта Сергей Неустроев иһитиннэрдэ.
Кини бырайыагы олоххо киллэриигэ Ил Дархан Айсен Николаев салайааччылаах регионнааҕы үлэ бөлөҕө тэриллибитин, онно министиэристибэлэр бэрэстэбиитэллэрэ, уопсастыбаннай тэрилтэлэр, муниципальнай тэриллиилэр баһылыктара киирбиттэрин билиһиннэрдэ.
«Ыраас Арктика» бырайыак үлэтин 2021 сыл атырдьах ыйын 25 күнүгэр саҕалаабыта. Бу күн Булун улууһун Тикcии бөһүөлэгин ыраастыыр субуотунньук ыытыллыбыта. Манна 50 киһилээх волонтердар, олохтоох нэһилиэнньэ уонна Арассыыйа оборонатын министиэристибэтин бөлөҕө 8 галаах сиртэн 300 туонна металлолому таһаарбыта.
Ити курдук 2022 сылга Булун уонна Усуйаана улуустарыгар салгыы маннык үс аахсыйа ыытыллыбыта. 2023 сылга Эдьигээн сэлиэнньэтигэр 27 туоннаттан тахса тимир тобоҕо хомуллан, 1,5 галаах сир ыраастаммыта. Оттон атырдьах ыйыгар Анаабыр Сааскылааҕын тимир бөхтөн босхолообуттара.
Эһиилги сылтан «Ыраас Арктика» географията кэҥиир чинчилээх. Ыраастыыр аахсыйалары Булун Найбатыгар, Дьааҥы Баатаҕайыгар уонна Эһэ Хайатыгар, Эдьигээҥҥэ, Аллайыаха Чокурдааҕар, Усуйаана Уус Куйга уонна Нижнеянскай бөһүөлэктэригэр ыытыахтара.
Сонун төрдө: СӨ Бырабыыталыстыбатын уонна Ил Дарханын пресс-сулууспата
