«Мисс УИС» күрэскэ ФСИН Саха сиринээҕи салаатын тэрилтэлэригэр үлэлиир 7 кыыс кытынна. Күрэс үс сылга биирдэ ыытыллар. Кыайыылаах Саха сирин аатыттан Арассыыйатааҕы күрэскэ кытта барыаҕа.
Күрэс бастакы түһүмэҕэр кыргыттар УИС үлэтигэр сокуон уонна быраап нуормалыыр аакталарын төһө билэллэрин, төһө бэргэнник ыталларын уонна эт-хаан өттүнэн төһө бэлэмнэрин тургуттулар.
Күрэс айар түһүмэҕэ конвоирование отделын аактабай саалатыгар буолла. Дьүүл сүбэтигэр УФСИН начаалынньыга Василий Седрисев уонна атын үлэһиттэр, УИС бэтэрээннэрэ, «Арассыыйа – мин устуоруйам» паарка медиа киинин салайааччыта, суруналыыс Олег Желнин киирдилэр.
Бэйэни көрдөрөр түһүмэххэ кыттааччылар төрүт таҥастарын кэтэн таҕыстылар, идэлэрин туһунан видеоролик көрдөрдүлэр, форма кэтэн байыаннайдыы уонна мааны былааччыйаны кэтэн хаамтылар.
Дьүүл сүбэтин быһаарыытынан, Мисс УИС» аатын пробация бөлөҕүн ыстаарсай иниспиэктэрэ Күннэй Бурнашева сүктэ. Кини идэни баһылааһын уонна эт-хаан өттүнэн үрдүк бэлэмнээҕин таһынан, көрөөччүлэргэ сценаҕа тутта-хапта сылдьарынан, талаанынан сөбүлэттэ.
Сонун төрдө: ФСИН Саха сиринээҕи салаатын пресс-сулууспата
