СӨ Бырабыыталыстыбатын бэрэссэдээтэлин солбуйааччыта Сергей Местников салайааччылаах тиэрмин хамыыһыйата толорор былаас уорганнарын официальнай сахалыы ааттарын бигэргэттэ.
Ол курдук, Бырабыыталыстыба уонна Ил Дархан дьаһалтатын, министиэристибэлэр, судаарыстыбаннай кэмитиэттэр, департаменнар, управлениелар уонна бастайааннай бэрэстэбиитэлистибэлэр сахалыы ааттарын, маны сэргэ доруобуйа харыстабылын эйгэтигэр туттуллар 60 кэриҥэ тиэрмин нууччалыыттан сахалыы тылбааһын бигэргэттилэр.
Сергей Местников бэлиэтээбитинэн, Гуманитарнай чинчийии уонна хотугу аҕыйах ахсааннаах норуоттарын кыһалҕаларын институтугар, ХИФК Хотугулуу Илин норуоттарын тылларын уонна култуураларын институтугар тиэрминнэри үөрэтиигэ улахан үлэ ыытыллыбыт. Кэлэр сылга тутуу, тырааныспар, култуура тиэрминнэрин бигэргэтиэхтэрэ.
«Аны бигэргэммит тиэрминнэри күннээҕи олоххо киллэриигэ – кэпсэтиигэ, сурукка, тэлэбиидэнньэҕэ, араадьыйаҕа, бэчээккэ уонна да атын эйгэлэргэ туттууга - үлэ ыытыахпыт. Ол хас биирдиибититтэн тутулуктаах. Тас дойду тыллара күннэтэ киирэ турдахтарына, саха тыллаах эйгэни кэҥэтии күүһүрүөхтээх», - диэн Сергей Местников тоһоҕолоон эттэ.
Сотору кэминэн хамыыһыйа быһаарыытын сырдатар-иһитиннэрэр таһаарыыларга тарҕатыахтара.
Сонун төрдө: СӨ Бырабыыталыстыбатын уонна Ил Дарханын пресс-сулууспата
