Ахсынньы 26 күнүгэр Ил Түмэҥҥэ РФ сенатора, Федеративнай тутулга, регионнааҕы бэлиитикэҕэ, олохтоох салайыныыга уонна Хоту сир дьыалаларыгар кэмитиэт чилиэнэ Сахамин Афанасьев анал байыаннай дьайыы кыттыылаахтарыгар хорсун, дьоруойдуу быһыыны оҥорбуттарын иһин судаарыстыбаннай наҕараадалары туттарда.
Сенатор байыастар сыл устата Луганскай уонна Донецкай норуодунай өрөспүүбүлүкэлэргэ, Запорожскай уонна Херсонскай уобаластарга бойобуой соруктары хорсуннук толорбуттарын бэлиэтээтэ уонна дириҥ махталын биллэрдэ. Салгыы кыргыһыы хонуутугар охтубут байыастары саҥата суох туран кэриэстээтилэр.
Сенатор Сахамин Афанасьев анал байыаннай дьайыыларга кытта сылдьан хорсун быһыыны көрдөрбүт, биһиги кэккэбититтэн суох буолбут Михаил Иванович Винокуровка анаммыт Хорсун быһыы уордьанын ийэтигэр Анна Михайловна Винокуроваҕа туттарда.
Салгыы «II истиэпэннээх хорсун быһыы» мэтээлинэн анал байыаннай дьайыыларга хорсун быһыыны көрдөрбүттэрин иһин наҕараадаланнылар: Николай Михайлович Николаев; Афанасий Петрович Саввин; Андрей Владимирович Нестеров; Валентин Николаевич Саввинов; Василий Иванович Матаркин.
Көрсүһүү бүтүүтэ Сахамин Афанасьев Арассыыйа сэбилэниилээх күүстэрэ ДНР Марьинка куоратын ылбыттарын туһунан үөрүүлээх сонуну иһитиннэрдэ. Кини бу куорат анал байыаннай дьайыы хаамыытыгар улахан суолталааҕын, Донецкай куоракка тэрээһиннээх охсуулар чопчу мантан оҥоһулла турбуттарын бэлиэтээтэ. Ытыктабыл бэлиэтигэр бары мустубут байыастарга Ил Дархан аатыттан саха быһаҕын бэлэхтээтилэр.
Сонун төрдө: Ил Түмэн пресс-сулууспата
