Бүлүү улууһун ырыаһыт дьонунан аатырбыт Тыымпы сэлиэнньэтигэр «Култуура» национальнай бырайыак иитинэн элбэх хайысхалаах култуура киинэ тутулунна. Эбийиэги 2024 сыл олунньу ыйыгар үөрүүлээхтик арыйыахтара. Киини тутуу 2022 сылга саҕаламмыта. Манна 160 мөл. көрүллүбүтэ.
Биир этээстээх таас дьиэҕэ 150 миэстэлээх көрөөччү саалата, үҥкүү саалата,миэбэлинэн, ирдэнэр тэрилинэн хааччыллыбыт гримернайдар бааллар. Култуура дьиэтэ Иннокентий Афанасьевич Боронов аатын сүгэринэн, кини бюһун туруоруохтара. Саҥа дьиэҕэ элбэх хайысхалаах бибилэтиэкэ үлэлиэҕэ.
I Тоҕус нэһилиэгин баһылыга Акимар Михайлов, национальнай бырайыак баар буолан, уһук сытар сэлиэнньэлэргэ култуура кииннэрэ тутуллалларын, онно дьон иллэҥ кэмин атаарарын таһынан куруһуоктарга сылдьан дьоҕурун арыйарын бэлиэтиир.
Национальнай бырайыак иитинэн Култуура дьиэтэ Сунтаар Кэппэндээйитигэр тутулла турар. 2024 сылга өссө үс култуура эбийиэгэ Сунтаар Кириэстээҕэр, Чурапчы Толоонугар уонна Аллараа Бэстээххэ тутуллуохтара.
Сонун төрдө: СӨ Бырабыыталыстыбатын уонна Ил Дарханын пресс-сулууспата
