Киир

Киир

Күндү биир дойдулаахтарым! Саха Өрөспүүбүлүкэтин салалтатын аатыттан уонна тус бэйэм ис сүрэхпиттэн эһигини Саҥа дьылынан эҕэрдэлиибин!

Саха Өрөспүүбүлүкэтигэр Үлэ сылын дьоһун ситиһиилэрдээх, саҥа үтүө үгэстэрдээх түмүктүүбүт.

Үлэ олоххо үтүөнү эрэ түстүүр аналыгар ытыктабыллаах сыһыан бэлиэтинэн “Үлэ киһитэ” бириэмийэ олохтоммута уонна быйыл бастыҥ 50 үлэһиккэ туттарыллыбыта буолар. Мантан ылата бу бириэмийэ биһиги өрөспүүбүлүкэбитигэр сылын ахсын туттарыллыаҕа! Саха сирин олохтоохторо – туруу үлэһиттэр!

Биһиги дойдубутугар кимиэхэ да, хаһан да оҥоһуллубатах санкциялар туһаайыллыбыттарын үрдүнэн өрөспүүбүлүкэбит урут ылыллыбыт кирбиилэри оннуларынан хаалларбытын ааһан, үүнэр-сайдар тэтим улаатарын ситистэ. Саха сирэ Арассыыйа биир бигэ тирэҕинэн, экэниэмикэ бөҕө-таҕа эркининэн ааттаныаҕын ааттанар. Ньиэби, гааһы хостооһуҥҥа сыл ахсын саҥаттан саҥа рекордар олохтоноллор. Алмааһы, чоҕу уонна көмүһү хостооһуҥҥа бигэ көрдөрүүлээхпит. 2023 сылга эрэгийиэннээҕи баалабай бородуукта барыллаан 2,3 трлн солкуобайтан итэҕэһэ суох сыаналанар. Пандемия кэннинээҕи кэмҥэ экэниэмикэбит үүнүүтүн тэтиминэн дойдуга инники күөҥҥэ сылдьабыт. 

Олоҕу олоруу уһуна өрөспүүбүлүкэҕэ аан бастаан 73,5 сааска тэҥнэстэ. Хас биирдии бэһис ыал элбэх оҕолоохторго киирсэр, оҕо төрөөһүнүн көрдөрүүтүнэн Арассыыйаҕа сэттис миэстэлээхпит. 2023 сыл биир бэлиэ түгэни бэлэхтээтэ – Саха сирин олохтоохторун ахсаана бэс ыйыгар биир мөлүйүөҥҥэ тэҥнэстэ!

Биһиги өрөспүүбүлүкэбит атын эрэгийиэннэри кытта бииргэ Арассыыйа тутулуга суох буолуутун, инники кэскилин туруулаһыыга кыайыыны уһансар. Буойуннарбыт Ийэ дойду көмүскэлигэр анал байыаннай дьайыы бастакы күннэриттэн туруммуттара. Биһиги хас биирдии хорсун боотурбутунан киэн туттабыт уонна дьиэлэригэр кыайыы көтөллөөх этэҥҥэ эргиллэн кэлэллэригэр баҕарабыт! Үүнэр сыл барыбытыгар сэриитэ суох саҥа эйэлээх олоҕу түстээтин! Уопсай кыайыыга Саха сирин тыһыынчанан олохтооҕо тус кылаатын киллэрэр. Биһиги армиябытыгар, буойуннарбыт дьиэ кэргэттэригэр көмөлөһөр амарах санаалаах дьоммутугар истиҥник махтанабын.

Бүгүн биһиги сорукпутунан уларыйыы-тэлирийии кэмин этэҥҥэ мүлчү түһүү эрэ буолбатах. Өрөспүүбүлүкэбит илин диэки хайыспыт Арассыыйа экэниэмикэтин үүнүүтүн-сайдыытын хамсатар күүһүнэн буоларга дьулуһуох тустаах. Саха сирин сүҥкэн баайа Арассыыйа доҕордуу дойдулары кытта аан дойду экэниэмикэтигэр өтөн киириитин торумун саҥа тутаах сүһүөҕэр кубулуйар. Арассыыйа Бэрэсидьиэнэ Владимир Владимирович Путин Уһук Илиҥҥи инфраструктураны сайыннарыыны көҕүлээбитин түмүгэр кыһалҕалаах боппуруостары быһаарыы хас да төгүл тэтимирдэ диэн бэлиэтиибин. Биһиги Арассыыйа элбэх омуктаах култууратын быстыбат сорҕотунан буолабыт. Ол НХСБ “Арассыыйа” форумҥа тэриллибит норуоттар икки ардыларынааҕы быыстапкаҕа дьэҥкэтик көһүннэ. Өрөспүүбүлүкэ экспозициятыгар мөлүйүөн аҥаара киһи сырытта, биһиги ситиһиилэрбитин дьон-сэргэ улаханнык кэрэхсээтэ. 

Күндү өрөспүүбүлүкэ олохтоохторо! Биһиги уопсай ситиһиибитигэр эһиги хас биирдиигит кылаата эмиэ баар. Бу Сахабыт сиригэр олорор уонна үлэлиир дьон биир ситимнээх үлэлэрин түмүгэ. Элбэх омуктаах өрөспүүбүлүкэбит улуу Арассыыйаны кытта бииргэ бигэтик иннибит хоту хардыылыырбыт дьоһун суолталаах.

Арассыыйа Бэрэсидьиэнэ Владимир Владимирович Путин 2024 сылы дойдуга Дьиэ кэргэн сылынан биллэрдэ. Биһиги өрөспүүбүлүкэбитигэр кэлэр сыл Оҕо саас сылынан буолуоҕа. Хас биирдии оҕо дьоллоох оҕо сааһы, тапталы, сылаас сыһыаны билиэхтээх, тус дьоҕурун арыйарыгар толору усулуобуйалаах буолуохтаах. Оҕолорбутугар аҕа көлүөнэттэн бэриллибит дьоһун суолталааҕы барытын – үрдүк өйү-санааны, Ийэ дойдуга бэриниилээх буолууну уһуйдахпытына, инники кэскилбит сырдык-ыраас буоларыгар бигэ эрэллээх буолуохпут!

Эһиэхэ дьоллоох-соргулаах Саҥа дьылы, эйэни, үтүөҕэ-кэрэҕэ эрэли, дьолу, чэгиэн-чэбдик буолууну, төрөөбүт өрөспүүбүлүкэбит уонна улуу дойдубут туһугар ситиһиилэри баҕарабын! Саҥа дьылынан! 

Саха Өрөспүүбүлүкэтин Ил Дархана А.С. Николаев

Санааҕын суруй

Бүтэһик сонуннар