Бу күннэргэ дойду үрдүнэн Арассыыйа бэчээтин күнэ киэҥник бэлиэтэнэр. Бэҕэһээҥҥиттэн саҕалаан Дьокуускайга сырдатар-иһитиннэрэр эйгэ үлэһиттэригэр аналлаах тэрээһиннэр ыытыллаллар. Сүрүн тэрээһин – суруналыыстарга судаарыстыбаннай наҕараадалары туттарыы бүгүн Бырабыыталыстыба дьиэтигэр буолан ааста. Манна бэчээттэнэр таһаарыылар, үрдүк таһымнарын ыһыктыбакка, үлэ аныгы ньымаларын баһылаан сайдан иһэллэрин бэлиэтээтилэр.
Суруналыыстары СӨ Бырабыыталыстыбатын бэрэссэдээтэлин солбуйааччыта Анатолий Семенов, СӨ Инновацияҕа, сыыппара сайдыытыгар уонна инфокоммуникационнай технологияларга миниистирэ Василий Ефимов, СӨ Суруналыыстарын сойууһун бэрэссэдээтэлэ «Саха» НКИХ генеральнай дириэктэрэ Олег Марков эҕэрдэлээтилэр.
«Ситим» медиа-бөлөх таһаарар "Кыым" хаһыатыттан бүтүн биэс үлэһит судаарыстыбаннай наҕараадалары туттулар. Ол курдук, хаһыат кэрэспэдьиэнэ Федор Рахлеев "Саха Өрөспүүбүлүкэтин үтүөлээх суруналыыһа" үрдүк ааты сүктэ. Кэрэспэдьиэннэр Туйаара Сергеева уонна Татьяна Захарова «Гражданскай килбиэн» бэлиэ хаһаайкалара буоллулар. Хаһыат шеф-эрэдээктэрэ Альберт Капрынов Саха сирин Ил Дарханын грамотатын тутта. «Ситим» медиа-бөлөх генеральнай дириэктэрэ Андрей Шилов Ил Дархан Махтал суругун тутта.
Маны таһынан, СӨ Суруналыыстарын сойууһа сыл ахсын олохтуур бириэмийэтигэр байыаннай дьайыы хаамыытын, кыһалҕаларын сырдатыы иһин ананар «СВОих не бросаем» номинацияҕа «Ситим» медиа-бөлөх генеральнай дириэктэрин солбуйааччыта, РФ үтүөлээх суруналыыһа Владимир Степанов бэлиэтэннэ. Кини анал байыаннай дьайыыны, кыттыылаахтары утумнаахтык сырдатар, ону сэргэ ДНР уонна ЛНР сиригэр-уотугар уһун командировкаларга сылдьан үлэлээбитэ.
Ытыктабыллаах кэллиэгэлэрбитин үрдүк ситиһиилэринэн истиҥник эҕэрдэлиибит! Үлэҕит өрүү үтүө түмүктээх уонна үрдүк махталлаах буоллун! Эһиги баар буолаҥҥыт, "Кыым" хаһыат - өрүү инники күөҥҥэ, өрүү норуотун кытта!
Эрэдээксийэ.
