Тохсунньу томороон тымныытын аахсыбакка, И.В. Николаев аатынан Харбалаах бөһүөлэгин сынньалаҥ киинигэр Кириһиэнньэ күн дьон-сэргэ тоҕуоруйа муһунна. Орто Амма нэһилиэгин олохтоохторо баһылык Альберт Кулачиков сыллааҕы отчуотун иһиттилэр уонна "Сыл бастыҥнарын чиэстээһиҥҥэ" олус көхтөөхтүк кытыннылар.
Баһылык ааспыт сыл Харбалаах нэһилиэгэ тутуллубута 60 сылын бэлиэтээһиҥҥэ олоҕуран ааспытын кэпсээтэ. Бастатан туран, нэһилиэги чэбдигирдэр субуотунньуктарга оҕотуттан аҕам саастаахтарга тиийэ дьон көхтөөхтүк кыттыбытын тоһоҕолоото, бар дьонугар махтанна.
Нэһилиэги ырааһырдыыга Ил Түмэн дьокутаата Прокопий Рахлеев салайааччылаах "Төлөн" ААО кэлэктиибэ куруук тиэхиньикэнэн көмө буоларын иһин улаханнык махтанна. Нэһилиэккэ быйыл үчүгэй эбиллии буолан, ахсааммыт 1000 тахсыбытын үөрэн туран иһитиннэрдэ. СВО-ҕа сылдьар уолаттарбытыгар, кинилэр дьиэ кэргэттэригэр куруук өйөбүл оҥоһулларын бэлиэтээтэ.
Нэһилиэк 60 сыллаах үбүлүөйүнэн урут тахсыбыт кинигэни ситэрэн, нэһилиэк ытык, кэрэ сирдэрин ис хоһоонун сырдатар кинигэ тахсыбыта. Ыһыахха нэһилиэкпит устуоруйатын сырдатар дьүһүйүү турбута. Харбалаахпыт бочуоттаах олохтооҕо Дмитрий Егорович Егоров, куораттан кэлэн, 200 кэриҥэ киһилээх икки хуору бэлэмнээбитин махталынан ахтылынна.
Күһүн улуус киинигэр Ытык Күөлгэ "Харбалаах күннэрэ" тэрээһин үрдүк таһымҥа ааспыта. Онтон ахсынньы ыйга дьоллоох Дьокуускайга, циркэ дьиэтигэр, "Харбалаах түмсүү" өйөбүлүнэн улахан тэрээһин ыытыллан, куоракка олорор Харбалаахтар түмсэн, улахан тэрээһин буолбута. Манна улахан алгыс сиэрэ-туома толоруллубута, араас атыы-тутуу, быыстапка, кинигэ биһирэмэ, кэскили түстүүр төгүрүк остуол тэриллибитэ. Киэһэ 5 чаастан Харбалаахтан тахсыбыт талааннаахтар, нэһилиэк олохтоохторун күүһүнэн, бар дьону үөрдэр, сомоҕолуур, сөхтөрөр улахан кэнсиэр ньиргийбитэ. Бу тэрээһиҥҥэ Харбалаахтан 80 кэриҥэ киһи киирэн кыттыыны ылан, таарыйа, киэн туттар биир дойдулаахпыт Иннокентий Корякин быыстапкатын көрөн, үөрэн-көтөн кэлбиппит.
Бастыҥнары чиэстээһин ыал буолан аал уот оттон, оҕо-уруу төрөтөн быр-бааччы олорбуттара үйэ аҥаара буолбут, нэһилиэк олоҕор өрүү көхтөөхтүк кыттар, сэргэхситэр Мария, Иван Слепцовтары эҕэрдэлээһинтэн саҕаланна. Онтон бииртэн биир нэһилиэк чулууларын эҕэрдэлээтилэр. Быйыл уон оҕоҕо күн сирин көрдөрбүт ийэлэри чиэстээһин олус долгутуулаах буолла.
Сүүһүнэн көхтөөх, ситиһиилээх олохтоохторбут үрдүк сыанаҕа тахсан бэлиэтэммиттэрин бар дьоммут дохсун ытыс тыаһынан кэрэһэлээтилэр. Тэрээһиҥҥэ ыаллыы сытар Чымнаайы нэһилиэгин баһылыга Егор Васильев анал ырыаһыттаах кэлэн эҕэрдэлээбитэ, тэрээһин ис хоһоонун дириҥэттэ, үс Амма нэһилиэктэрин сомоҕолоһууларын чаҕылхай туоһута буолла.
Эҕэрдэ кэнсиэргэ Дьүлэй нэһилиэгин ырыаһыт уолаттара, Таатта сирин киэн туттуута – "Доҕордоһуу" ансаамбыл кыттыбыта олус сонун, кэрэхсэбиллээх буолла. Бу тэрээһини иилээбит-саҕалаабыт баһылыгы солбуйааччы Анна Васильеваҕа, сынньалаҥ киинин үлэһиттэригэр барҕа махталбытын тиэрдэбит!
Тапталлаах Харбалаахпыт сыллата сайда-үүнэ турдун, ыччаттарбыт Харбалааҕы үтүөнэн эрэ ааттата сырыттыннар!
