Виктор Лебедев: “Саханефтегазсбыт” ньиэп бородууктатын кыһыҥҥы суолунан тиэрдэр соругун толоруоҕа”

Тохсунньу 15 күнүттэн “Саханефтегазсбыт” АУо кыһыҥҥы суолунан ньиэп бородууктатын тиэйэн эрэр.

2024 сыл бастакы аҥаарыгар кыһыҥҥы суолунан уопсайа 39 220 туонна ньиэп бородууктатын тиэрдэр былааннаах. “Саханефтегазсбыт” АУо генеральнай дириэктэрэ, СӨ норуодунай дьокутаата Виктор Лебедев иһитиннэрбитинэн, тохсунньу 17 күнүнээҕи туругунан 5 960 туоннаны тиэйбиттэр.

Быһааран этэр наада: өрүһү туоратарга көҥүллэнэр ыйааһын кээмэйэ улааттаҕына, ол официальнайдык бигэргэннэҕинэ, ньиэп бородууктатын күүскэ тиэйэн барыахтара.

– Ааспыт сылы кытта тэҥнээн көрдөххө, быйыл күн-дьыл туругуттан сылтаан, суол көҥүллэнэр болдьоҕо ууһаата. Муус өссө да чараас, 30-40 туоннаҕа диэри таҕаһас көҥүллэнэрин күүтэбит. “Арктика суоллара” СӨ КП сабаҕалыырынан, хотугу улуустарга тохсунньу 25 күнүттэн улахан ыйааһыннаах таһаҕаһы тиэйии көҥүллэниэҕэ, – диэн Виктор Лебедев эттэ.

– Дьааҥы сүнньүгэр баар улуустар логистикалара, холобур, Аллараа Дьааҥы – Уус Куйгаа суола ордук уустук. Манна билигин 10 туоннаҕа диэри уйуктаах тырааныспар эрэ көҥүллэнэр. Ол эрээри “Саханефтегазсбыт” АУо ньиэп бородууктатын кыһыҥҥы суолунан тиэрдэр соругун халбаҥа суох толоруоҕа, – диэн генеральнай дириэктэр иһитиннэрдэ.

Маны таһынан, ааспыт нэдиэлэттэн Аллараа Бэстээхтээҕи ньиэп базатыттан Дьокуускайдааҕы ньиэп базатыгар ньиэп бородууктатын “Shacman” 3 саҥа бензовоһунан тиэйбитинэн барбыттара. Бу тырааныспардары “Саханефтегазсбыт” АУо филиал автопааркатын саҥардыы бырагырааматын чэрчитинэн атыыласпыта.

Санатан этэбит: олохтоохтору, туһанааччылары хаачыстыбалаах ньиэп бородууктатынан халбаҥа суох хааччыйарга тэрилтэ 2019 сылтан автопаарканы тупсарар үлэни анал былаанынан ыытар. Ол курдук, 2023 сыллаахха Арассыыйа 1/5-һин ылар киэҥ иэннээх Саха сирин соҕуруу, арктическай оройуоннарын барытын хабар тэрилтэ 19 филиалын учуоттаан туран, автопааркаҕа 30 анал тиэхиньикэни атыыласпыта. 2022 сыллаахха автопаарка 32 саҥа тиэхиньикэлэммитэ.

 “Саханефтегазсбыт” АУо маркетиҥҥа уонна тиэрдиигэ отделын начаалынньыга Егор Захаров эппитинэн, “Shacman” бензовоз Саха сирин тыйыс усулуобуйатыгар айанныырга, таһаҕас тиэйэргэ сөптөөх, тырааныспар атын көрүҥүн кытта тэҥнээтэххэ, ороскуота уонна экологияҕа дьайыыта кыра. Ааспыт нэдиэлэҕэ “Shacman” бензовозтар күн аайы биирдии эриэйсэни оҥорбуттара, кэлэр нэдиэлэттэн Аллараа Бэстээх, Дьокуускай филиаллара күннэри-түүннэри үлэлиир эрэсиимҥэ киириэхтэрэ. Ол түмүгэр сууккаҕа 150 туонналаах ньиэп бородууктатын тиэрдиэхтэрэ, күҥҥэ хас да эриэйсэни оҥоруохтара.

Маны сэргэ “Саханефтегазсбыт” АУо “Об утверждении плана завоза и реализации тарированных нефтепродуктов в Республике Саха (Якутия) на 2024 год по сезонным дорогам в зимний период и навигацию” СӨ Гражданскай оборуона уонна нэһилиэнньэҕэ куттал суох буолуутун хааччыйыы министиэристибэтин бирикээһинэн өрөспүүбүлүкэ ыраах сытар, уустук суоллаах-иистээх нэһилиэнньэлээх пууннарыгар анал иһиттээх ньиэп бородууктатын тиэрдиигэ сайаапканы хомуйуну уонна дуогабары түһэрсиини салҕыыр.

– 2 429,563 туонна анал иһиттээх ньиэп бородууктатын уһук нэһилиэктэргэ тиэрдэр сорук турар, – диэн Егор Захаров бэлиэтээтэ.