Дьокуускайга саҥа тутуллубут Искэни эмтиир диспансерга аһылларга бэлэм буолла. Эбийиэги «Искэн ыарыыларын утары охсуһуу» федеральнай бырайыак уонна «Доруобуйа харыстабыла» национальнай бырайыак иитинэн туттулар.
Билигин манна мэдиссиинэ тэрилин таҥан бүтэрэн эрэллэр. Киин лучевой диагностикаҕа киинин салайааччыта Майя Тихонова иһитиннэрбитинэн, манна аныгы тэриллэри, ол иһигэр сэдэх, дойду үрдүнэн үс эрэ сиргэ баар спектральнай, 260 срезтаах компьютернай томограбы туруорбуттар. Ону таһынан магнитно-резонанснай томограф, рентген-комплекс, ангиографическай установка диэн уонна да атын – барыта холбоон 1880 тэрили туруордулар.
Сүрүн быраас Татьяна Николаева саҥа диспансер эпэрээссийэ оҥорор 8 саалалааҕын бэлиэтээтэ. Онон, эпэрээссийэни оҥоруу 2 тыһыынчаттан 4,5 тыһыынчаҕа тиийэ элбиэҕэ. Урукку диспансерга 500 кэриҥэ киһи үлэлээбит буоллаҕына, аны тыһыынчаттан тахса киһи үлэлиэҕэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Хаартыска: Андрей Сорокин, ЯСИА
