Мобильнай быраастар саҥа сылга бастакы биригээдэлэрэ арктикатааҕы Аллараа Халыма улууһугар айаннаата. Оҕо быраастара үлэлэрин тохсунньу 27 күнүгэр Андрюшкино бөһүөлэктэн саҕалаатылар. Кинилэр алын сүһүөх үөрэнээччилэрин көрдүлэр.
Биригээдэҕэ икки педиатр, кардиолог, невролог, эндокринолог, ЛОР, гинеколог, эндокринолог, травматолог, хирург-уролог, УЗИ исписэлииһэ, офтальмолог киирдилэр. Барыта 170 оҕону көрдүлэр, сүбэ-ама биэрдилэр, эмп анаатылар. Быраастар быйылгыттан биохимическэй анаалыһы, гепатикка ИФА-ны, гликированнай гемоглобины үрдүгэр быһаарыахтара диэн бэлиэтиир тоҕоостоох.
Манна кинилэр тохсунньу 31 күнүгэр диэри үлэлээн баран Колымское сэлиэнньэҕэ барыахтара. Онтон улуус бары нэһилиэнньэлээх пууннарыгар сылдьыахтара. Салгыы Эбээн-Бытантайга тиийэр санаалаахтар. Ити курдук сыл устата оҕо быраастара арктикатааҕы улуустар оҕолорун көрөн бүтэриэхтэрэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
