Саха сирин олохтооҕо имэҥ-дьалыҥ өҥөтүнэн туһанаары түөкүннэргэ киирэн биэрбит. Эр киһи интэриниэттэн харчыга хоонньоһор дьахтар биллэриитин булан, ыйылла сылдьар нүөмэргэ эрийбитигэр, бастаан “16 000 солкуобайы ыыт” диэбиттэр.
Биллэн турар, имэҥнээх тапталга утаппыттыы баҕара сылдьар киһи туох да кэтэх санаата суох харчытын ыытан кэбиспит. Өтөр киниэхэ харчы киирбитин туһунан эрийэн иһитиннэрбиттэр уонна кыыска “куттал суоһаабатын мэктиэтэ” диэн эбии харчы көрдөөбүттэр.
Уопсайынан, итинник ньыманан албыннаан, өйүн сүүйэн уонна сүүлүктээн, түөкүннэр киниттэн барыта 253 500 солкуобайы ыһыгыннарбыттар. Суруйалларынан, ол харчыттан 110 тыһыынчатын эр киһи кирэдьиит каартатыттан устан ыытаахтаабыт үһү. Судургутук эттэххэ, баантан иэс ыалбыт. Түөкүннэр тутуллубуттарын туһунан иһитиннэрии билиҥҥитэ суох.
Ити туһунан ИДьМ Нерюнгритааҕы салаата иһитиннэрэр.
Хаартыска: интэриниэт аһаҕас источнига
