Бэҕэһээ Үөһээ Бүлүү сэлиэнньэтигэр чааһынай дьиэ умайан 2018 уонна 2021 с.т. оҕолор тыыннара быһынна. Эбэлэрэ алта ыйдаах сиэнин кытта түннүгүнэн ыстанан быыһанна диэн суруйаллар. Оҕолор төрөппүттэрин кытта уйулҕа идэлээхтэрэ үлэлэһэллэр.
Үөһээ Бүлүү улууһун дьаһалтатыгар бүгүн бу иэдээн тула суһал мунньах буолла. Нэһилиэк баһылыга Максим Силигиянов дьиэ кэргэҥҥэ сайыҥҥыга диэри олорор дьиэ биэриэх буолла. Маны сэргэ, улуустан уонна нэһилиэктэн харчынан көмө оҥоһуллуо.
Иэдээн хатылламматын туһугар, бары олохтоохторго АДПИ (Автономный дымовой пожарный извещатель) туруорарга сүбэлээтилэр. Эрэдээксийэ аатыттан былаҕайгы былдьаммыт оҕолор төрөппүттэригэр, аймахтарыгар кутурҕаммытын биллэрэбит.
Сонун төрдө: Ыксаллаах быһыы-майгы министиэристибэтэ, Үөһээ Бүлүү улууһун дьаһалтата
