Ааспыт сайын Туймаада ыһыаҕын кэмигэр Ил Дархан Айсен Николаев уонунан тыһыынча киһи ортотугар: “Өрөспүүбүлүкэбит нэһилиэнньэтэ 1 000 000 киһи буолла!” – диэн бар дьоҥҥо үөрүүлээх сонуну иһитиннэрбитэ. Онон, былырыын мөлүйүөн буолбуппут. Оттон быйыл ахсааммыт мөлүйүөнү куоһаран хас буолла? Эбилиннибит дуо?
Бу күннэргэ өрөспүүбүлүкэ үрдүнэн үгэс буолбут бырабыыталыстыба отчуота буола турар. Онно эппиттэринэн уонна 2023 сыл түмүгүнэн отчуот быһыытынан бигэргэммит докумуоннартан көстөрүнэн, 2024 сыл тохсунньу 1 күнүнээҕи туругунан, Саха сирин нэһилиэнньэтин ахсаана 1 001 900 киһиэхэ тэҥнэспит.
Өрөспүүбүлүкэбит оҕо төрөөһүнүн ахсаанынан Арассыыйа Федерациятын уон бастыҥ эрэгийиэнигэр киирсэр. Оттон айылҕа быһыытынан нэһилиэнньэ ахсаана эбиллиитинэн (естественный прирост) 7-с, Уһук Илин эрэгийиэннэригэр – 1 миэстэлээх.
2023 сыл тохсунньу-сэтинньи ыйдарыгар 1 тыһыынча нэһилиэнньэҕэ айылҕа быһыытынан эбиллии 3,5 киһиэхэ тэҥнэспит, ол ааспыт сыл таһымыттан 2,9 бырыһыанынан үрдүк (2022 с. – 3,4).
Гражданскай турук аактарын толорор уорган чахчытынан, 2023 сылга өрөспүүбүлүкэҕэ 11 282 оҕо төрөөн, Саха сирэ бу көрдөрүүнэн Уһук Илиҥҥэ урукку курдук 1 миэстэни, дойдуга 8-с миэстэни ылбыт.
Хаартыска: СИА
