Бүгүн, олунньу 7 күнүгэр, Дьокуускайга Өрөспүүбүлүкэтээҕи онкология диспансера уонна радиология салаата үлэҕэ киирэр үөрүүлээх тэрээһинэ буолла. Эбийиэк РФ Бэрэсидьиэнэ Владимир Путин сорудаҕынан «Доруобуйа харыстабыла» национальнай бырайыак «Онкология ыарыыларын утары охсуһуу» региональнай бырайыак иитинэн тутулунна.
Ил Дархан Айсен Николаев бу түгэн өрөспүүбүлүкэҕэ доруобуйа харыстабылыгар сүҥкэн суолталааҕын, ыарыһахтар аны ханна да барбакка үрдүк таһымнаах көмөнү ылар кыахтаммыттарын бэлиэтээтэ.
Тэрээһиҥҥэ РФ Судаарыстыбаннай Дууматын дьокутаата Галина Данчикова кытынна. Кини онкология киинин тутуу Судаарыстыбаннай Дуума хонтуруолунан ыытыллыбытын, билигин манна ыарахан ыарыыны кыайарга бары усулуобуйа тэриллибитин бэлиэтээтэ.
Үрдүк категориялаах хирург-онколог, СӨ үтүөлээх бырааһа, онкология сулууспатын бэтэрээнэ Татьяна Мигалкина маннык күн үүммүтүттэн дьоллооҕун, үөрэнээччилэрэ аан дойду таһымнаах хирург, онколог буолбуттарынан киэн туттарын билиннэ.
Эдэр исписэлиистэр ааттарыттан абдоминальнай онкология салаатын хирург-онколога Александр Осипов тыл эттэ. Кини эдэр онкологтар ыарыыны аҕыйатыыга бэйэлэрин кылааттарын киллэрэргэ бэлэмнэрин эттэ.
Киин поликлиниката олунньу 4 күнүттэн үлэлии турар. Алдантан көрдөрө кэлбит Яна Протодьяконова арыалдьыта Наталья Военковалыын бары өттүнэн хааччыллыылаах, бастыҥ усулуобуйалаах Кииҥҥэ кэлэн көрдөрүнэ сылдьалларыттан үөрэллэрин, үлэһиттэр сыһыаннарыттан астыналларын кэпсээтилэр.
Санатар буоллахха, эбиэйиги тутуу 2017 сыллаахха саҕаламмыта. 25 000 кв.м. иэннээх кииҥҥэ 180 сытар миэстэлээх стационар уонна биир симиэнэҕэ 210 киһини көрөр поликлиникалаах. Үлэһиттэр бас билиилэригэр үрдүк кылаастаах 1880 эдинииссэ тиэхиньикэ баар. Онон, манна ыарыыны быһаарыыттан саҕалаан эмтээһини уонна эпэрээссийэни кыайа тутуохтара.
Сонун төрдө: СӨ Бырабыыталыстыбатын уонна Ил Дарханын пресс-сулууспата
