Күн сирин дьонун көмүскүүр, араҥаччылыыр аналлаах, эмтиир-томтуур олус туһалаах идэлээх дьону иитэн таһаарар сырдык кыһа – Дьокуускайдааҕы мэдиссиинэ колледжын салайааччыта, ытыктабыллаах Дмитрий Афанасьевич Алексеев тэрийэн, анал дэлэгээссийэ саха сээркээн сэһэнньитэ, норуот тапталлаах суруйааччыта Николай Егорович Мординов-Амма Аччыгыйын аатын сүгэр үөрэхтээһин холбоһугар ыалдьыттаата.
Дэлэгээссийэ эмчиттэри бэлэмниир кыһа үлэтин-хамнаһын билиһиннэрэр соруктаах сырытта. Колледж преподавателлэрэ уонна устудьуоннара эмчит идэтигэр умсугутар киэҥ ис хоһоонноох маастар-кылаастары ыыттылар, лиэксийэлэри аахтылар. Маны сэргэ, кинилэр төрөппүттэргэ олус туһалаах сүбэлэри биэрдилэр, учууталларга үөрэххэ туттарсыы бэрээдэгин иҥэн-тоҥон билиһиннэрдилэр.
Уопуттаах салайааччы Дмитрий Афанасьевич холбоһук кэлэктиибигэр олус сыаналаах сүбэлэри биэрдэ. Оскуола үөрэнээччилэригэр "Айар" кинигэ кыһата атыылыыр болҕомтолоох, тулуурдаах, кыраҕы, сымса буоларга уһуйар оонньуурдарын бэлэхтээтэ. Маннык оонньуурдары бэйэҕит оҥостуҥ диэн оҕолорго сорудахтаата.
Сахабыт сиригэр эмчит идэлээх ыччаты үөрэтэн таһааран, норуоппут уһун олохтоох, чэгиэн-чэбдик сылдьарын туһугар сүдү кылаатын киллэрсэр кыһа тыа сирин кытта ситим олохтуур буолбута олус кэрэхсэбиллээх.
Кэнники сылларга улуустарга бэйэлэрин салааларын арыйан, орто үөрэхтээх эмчиттэри тыа сиригэр анаан бэлэмниир суолга туруммуттарын бары биһириибит! Үрүҥ халааттаах аанньаллары үксэтэн, күүс-көмө, өйөбүл буоларгыт иһин махтанабыт!
Ити курдук сибээспит салҕанан баран иһиэ диэн эрэллээх күндү ыалдьыттарбытыгар дириҥник махтанныбыт.
