Ааспыт сыл түмүгүнэн чөл олоҕу тутуһар дьон ахсаана дойду үрдүнэн 27,6% улааппыт. Маннык көрдөрүүнү FinExpertiza аудиторскай-консалтинговай ситим аналитикаҕа сулууспата Росстат дааннайыгар олоҕуран таһаарда.
Чөл олоҕу кытаанахтык тутуһар, тутуһа сатыыр уонна утарар дьон ахсаанын тэҥнээн баран, аналитиктар чөл олохтоох регионнар ханныктарын быһаардылар. Ол курдук, бастакы миэстэҕэ, 693 баалы ылан, Ингушетия таҕыста. Манна саамай элбэх чөл олоҕу кытаанахтык тутуһааччы уонна саамай аҕыйах чөл олоҕу утарааччы олорор.
Иккис миэстэни - 590 бааллаах Чечня, үһүс миэстэҕэ - 560 бааллаах Хотугу Осетия ыллылар. Чөл олоххо ордук тардыһар уон регион ахсааныгар Чувашия (548 баал), Севастополь (546 баал), Кабардино-Балкария (536 баал), Новгородскай уобала (517 б), Удмуртия (507 б), Краснодарскай кыраай (483 б), Крым (483 б) киирдилэр.
Оттон чөл олоҕу тутуспат олохтоохторун ахсаана элбэҕинэн маннык регионнар инники күөҥҥэ сылдьаллар: Дьэбириэй автономиялаах уобалаһа (62 б), Сахалин уобалаһа (112 б), Чукотка автономиялаах уокуруга (128 б), Москуба (130 б; манна чөл олоҕу кытаанахтык тутуһааччы олус аҕыйах, оттон нэһилиэнньэ 61%-на чөл олоҕу утарар), Саха сирэ (141 б), Красноярскай кыраай (153 б), Пенза уобалаһа (155 б), Хабаровскай кырыай (169 б), Амыр уобалаһа (186 б) уонна Орел уобалаһа (199 б).
Дьиктитэ диэн, Москубаҕа тэҥнээтэххэ, Санкт-Петербурга чөл олоҕу тутуһааччы ахсаана быдан элбэх (284 б), онон дойду үрдүнээҕи орто көрдөрүүнү биэрэр. Манан сылыктаатахха, култуура сайдыыта чөл олохтоох уопсастыба үөскүүрүгэр элбэҕи быһаарар?
Сонун төрдө: https://finexpertiza.ru/
