Олунньу 29 күнүгэр “Восточнай” космодромтан “Метеор-М” диэн аппарааты куосумаска таһаарыахтаах “Союз-2.1б” аракыата тобоҕо Саха сиригэр икки улууска түһүөн сөп. Ол туһунан СӨ Экологияҕа министиэристибэтэ иһитиннэрэр.
“Былаан быһыытынан, аракыата олунньу 29 күнүгэр олохтоох бириэмэнэн 14:43 чааска көтүөхтээх, кини тобохторо Алдан уонна Бүлүү улуустарыгар РП 983 уонна РП 985 учаастактарга түһүөхтэрин сөп”, – диэн иһитиннэриигэ суруйаллар.
Бэлиэтээн этэллэринэн, урут ити космодромтан 14 төгүл аракыатаны ситиһиилээхтик көтүппүттэр. “Экология чинчийиилэрэ көрдөрөллөрүнэн, аракыата тобоҕо түспүт сирдэригэр сир-уот нуорманы таһынан киртийбитэ бэлиэтэммэт. Булуллубут тобохтору кэнтиэйнэрдэргэ уган, “Восточнай” космодромҥа утилизацияҕа ыыталлар”, – диэн пресс-сулууспа суруйар.
Бэй.кэр.
russian.space хаартыската
