Саха сирин олохтооҕо киһи 400 киилэ балыгы көҥүлэ суох бултаан, холуобунай дьыалаҕа эрилиннэ. Хоромньуну 315 тыһыынча солкуобай диэн сыаналаабыттар. Ол туһунан “КП-Якутия” суруйар.
СӨ ИДьМ иһитиннэрэринэн, 40 саастаах Удачнай куорат олохтооҕо 400 киилэ араас балыгы 2023 сыллаахха балаҕан ыйыгар Өлөөн улууһун Уһук Силигир үрэҕэр бултаабыт. Кини мотуордаах оҥочонон сылдьан 212 быйыты, 123 майаҕаһы, 5 дьарҕааны уонна 1 сордоҥу илимнээн ылбыт. Оттон Уһук Силигир үрэххэ биирдиилээн дьон (любительскай) илиминэн балыктыылларын көҥүллүүр анал учаастак суох.
Полиция үлэһиттэрэ эр киһиттэн көҥүлэ суох туппут балыгын уонна 16 илимин – барытын былдьаабыттар. Эспэртиисэ хоромньуну 315 тыһыынча солкуобай диэн аахпыт. РФ ХК 256 ыстатыйатын 3 чааһынан холуобунай дьыаланы көбүппүттэр. Ол гынан баран, эр киһини хаайбатахтар, “ханна да кэлиэм-барыам суоҕа” диэн илии баттатан, көҥүлгэ хаалларбыттар.
ИДьМ хаартыската.
