Саха сиригэр “Арассыыйа почтатын” хамнаһы ааҕар отделын урукку салайааччыта дьахтары 5 сыл уопсай эрэсиимнээх хаайыыга ыытарга уураахтаатылар. Ити туһунан СИА суруйар.
Холуобунай дьыаланы өссө 2023 сыллаахха көбүппүттэр. Силиэстийэ быһаарбытынан, отдел салайааччыта дьахтар дуоһунаһын туһанан, көмпүүтэр бырагырааматыгар сымыйа чахчылары киллэрэн, тэрилтэ бүддьүөтүттэн инньэ 40-тан тахса мөлүйүөн солкуобайы уорбут.
“Сууттанааччы 40 816 989,78 солкуобайы уорууга буруйданна уонна 5 сыл көҥүлэ сарбылынна (уопсай эрэсиимнээх холуонньаҕа). Ону таһынан, суут “Арассыыйа почтатын” туһугар 40 816 989,78 солк. суумалаах хоромньуну толуйар ирдэби толорорго уураахтаата”, – диэн ФСБ Саха сиринээҕи салаатын иһитиннэриитигэр суруйаллар.
Дьахтар тутуллубут баайын-дуолун хоромньутун толуйар туһугар атыылыахтара.
Бэй.кэр.
СИА хаартыската.
