Олунньу 21 күнүгэр Л.А. Колосова аатынан 33 №-дээх оскуолаҕа Бүтүн Арассыыйатааҕы «Дьоруой паартата» бырайыак иитинэн, анал байыаннай дьайыы кыттыылааҕа, биллиилээх уопсастыбаннай диэйэтэл Савва Михайловка анаммыт паартаны туруордулар. Дьоруой паартатыгар бастакынан кини оҕолоро, оскуола көхтөөх үөрэнээччилэрэ Владилена уонна Всеволод олордулар.
Үөрүүлээх түгэнинэн оскуола үөрэнээччилэрин, үлэһиттэрин уонна ыалдьыттарын дириэктэр Прокопий Батюшкин эҕэрдэлээтэ. Салгыы Савва Анатольевиһы үтүө тылынан бочуоттаах ыалдьыттар аҕыннылар. Байыас кэргэнэ Валерия Александровна бу кинилэр дьиэ кэргэннэригэр уонна ыччаты иитиигэ сүҥкэн суолталаах бырайыагы олоххо киллэрэргэ көмөлөспүт дьоҥҥо истиҥник махтанна.
Паартаҕа Савва Михайлов хаартыската, олоҕун чахчыларын уонна үтүөлэрин кэпсиир иһитиннэрии баар. Дьоруой паартатыгар олорор быраабы туйгун сыаналаах, уопсастыбаннай үлэҕэ көхтөөх уонна айымньылаах үөрэнээччилэр ылар буолуохтара.
Сонун төрдө: Дьокуускай куорат уокуруктааҕы дьаһалтата
