Олунньу 24 күнүгэр Дьокуускайга “Сулус” полигоҥҥа Сэбиэскэй сойуус Дьоруойа Федор Охлопков аатыгар Аан бастакы Бүтүн Арассыыйатааҕы ырааҕы ытыыга турнир түмүк тэрээһинэ буолла.
Кыайыылаахтары РФ Бырабыыталыстыбатын бэрэссэдээтэлин солбуйааччыта, РФ Бэрэсидьиэнин Уһук Илиҥҥэ боломуочунай бэрэстэбиитэлэ, турнир сүрүн судьуйата Юрий Трутнев, СӨ Ил Дархана Айсен Николаев уонна Арассыыйа Дьоруойа, гвардия майора, сүрүн судьуйа солбуйааччыта Ярослав Якубов наҕараадалаатылар.
Юрий Трутнев бэлиэтээбитинэн, “Сулус” курдук үчүгэй полигон Арассыыйаҕа өссө суох. Манна күнүстэри-түүннэри 4 км диэри ыраахха ытыыга эрчиллиэххэ сөп. Онон, үрдүк таһымнаах ытааччылары, снайпердары бэлэмниир усулуобуйа баар буолбут. Саха сириттэн элбэх аатырбыт снайпер тахсыбытынан, турниры манна тэрийэргэ быһаарбыттар.
Күрэхтэһии түмүгүнэн, «День» түһүмэххэ үһүс миэстэни «Добрый» уонна «Кедр» позывнойдаах снайпердар пааралара ылбыт. Кинилэр 500 тыһ. солкуобайдаах сэртипикээтинэн наҕараадаланнылар.
Иккис миэстэни снайпер Дмитрий Радченко уонна корректировщик Сергей Кириченко таҕыстылар. Кинилэр саҥа «Сокол» вездеходка күлүүс туттулар.
Бастакы миэстэни снайпер Сергей Яковлев уонна корректировщик Василий Яковлев ыллылар. Кыайыылаахтарга саҥа пикап массыына күлүүһүн туттардылар.
Маны таһынан анал бириистэр олохтоннулар. «Интеллигент» позывнойдаах снайперга «Техномеханика» хампаанньаттан винтовка уонна «Навигатор» хампаанньаттан тепловизионнай прицел биэрдилэр. «Калашников» хампаанньалар бөлөхтөрө турнир кыайыылаахтарыгар уонна «Лис» позывнойдаах ДНР ытааччытыгар анал таҥас уонна тэрил туттарда. «Навигатор» хампаанньаттан корректировщик турбатын «Кузнец» уонна «Шмель» позывнойдаах снайпердар ыллылар.
Юрий Трутнев судьуйалар уустук усулуобуйаҕа үлэлээбиттэрин бэлиэтээтэ уонна махтанан туран, дьүүллүүр биригээдэ үлэтин үчүгэйдик тэрийбитин иһин, «Марк» позывнойдаах аҕа судьуйаҕа анал бириис – хронограф бэлэхтээтэ.
Маннык полигон Саха сиригэр аһыллыыта туох суолталааҕын Владимир Путин турнир кыттааччыларыгар эҕэрдэтигэр тоһоҕолообута. Кини турнир аатырбыт снайпер Федор Охлопков дойдутугар ыытыллара сөптөөҕүн ыйан туран, анал байыаннай дьайыы кыттыылаахтарын, силовой структура үлэһиттэрин уонна таба ытыыны сөбүлүүр дьону түмэр күрэхтэһии өрөспүүбүлүкэ уонна Уһук Илин успуордун биир сүҥкэн суолталаах тэрээһинэ буоларын тоһоҕолообута.
