Олунньу 25 күнүттэн, бэҕэһээҥҥи өрөбүлтэн, быыбар хамыыһыйалара мөлтөх суоллаах-иистээх уонна кырыы сирдэргэ РФ Бэрэсидьиэнин быыбарыгар болдьоҕун иннинэ куоластааһыны саҕалаатылар.
“Болдьоҕун иннинэ куоластааһыҥҥа өрөспүүбүлүкэ 26 улууһугар мөлтөх суоллаах-иистээх уонна кырыы сирдэргэ олорор, үлэлии-хамсыы сылдьар 13 тыһыынча кэриҥэ киһи кыттыахтаах. 76 УИК үлэһиттэрэ барыта 374 хайысханан сылдьыахтара: 270 сиргэ – араас массыынанан, 104 сиргэ – авиа-көлөнөн”, – диэн СӨ Киин быыбардыыр хамыыһыйатыгар кэпсээтилэр.
Болдьоҕун иннинэ куоластааһыҥҥа, сүрүннээн, баахта, метео-ыстаансыйа үлэһиттэрэ, сылгыһыттар уонна табаһыттар, о.д.а. кыттыахтара.
УИК чилиэннэрэ бастакы күҥҥэ Хаҥалас улууһугар сырыттылар. Дойду сүрүн быыбарыгар “Бөртө” сылгы собуотун үлэһиттэрэ кытыннылар. Ол курдук, быыбардыыр учаастак хамыыһыйатын бэрэссэдээтэлэ Юлия Петрова УИК чилиэннэрэ Алена Максимованы уонна Виктор Ефремовы кытта Сыһыы арыыга баар сылгыһыттар базаларыгар тиийдилэр.
Санаттахха, быйыл дойду бэрэсидьиэнин быыбара ахсыс төгүлүн ыытыллар. Онно түөрт киһи кыттар:
- Владислав Андреевич Даванков (“Саҥа дьон”);
- Владимир Владимирович Путин (бэйэтэ турааччы);
- Леонид Эдуардович Слуцкай (ЛДПР);
- Николай Михайлович Харитонов (КПРФ).
Yakutia24.ru суруйуутуттан.
