“Муус устар – 2024” өрөспүүбүлүкэтээҕи бэстибээл чэрчитинэн ыытыллыбыт “Саас” оҕолорго анаммыт медиа-пуорумҥа норуот дьокутаата Виктор Лебедев “Тиэкис бастыҥ ааптара” анал бирииһин С.Д. Флегонтов аатынан Хадаар орто оскуолатын 7-с кылааһын үөрэнээччитэ Алена Ксенофонтова (Чурапчы ул.) тутта.
Эдэр кэрэспэдьиэҥҥэ анал бирииһи “Бэс Чагда” оҕо доруобуйатын чэбдигирдэр, сынньалаҥы тэрийэр кииҥҥэ бырайыактары көмүскүүр уонна пуорум хамаандаларын наҕараадалыыр кэмҥэ үөрүүлээх быһыыга-майгыга туттардылар. Тэрээһиҥҥэ Саха сирин бары муннугуттан уопсайа 80 оҕо кытынна. “Кэскил” кыһа оскуола медиа-кииннэригэр дьарыктанар 400 үрдүк кылаас үөрэнээччититтэн кыттааччылары сүүмэрдээбитэ.
Виктор Лебедев медиа-пуорум кыттааччыларыттан кэлин маассабай иһитиннэрии эйгэтигэр идэтийбит дьон үүнэн-сайдан тахсалларыгар уонна хаачыстыбалаах, эппиэтинэстээх суруналыыстыка сайдыытыгар күүс буолалларыгар эрэнэрин биллэрдэ:
– Эдэр исписэлиистэри оскуолаҕа үөрэнэр эрдэхтэриттэн бэлэмнээн таһаарыахха диэн идиэйэни өйүүбүн. “Кэскил” өрөспүүбүлүкэтээҕи оҕо кыһата бу хайысхаҕа үлэлэһэрэ кэрэхсэбиллээх. “Саханефтегазсбыт” АУо ньиэп-гаас салаатыгар эдэр каадыры бэлэмнииргэ үс түһүмэхтээх профориентация бырагырааматын ылынна. Биир түһүмэҕэ – үрдүк кылаас үөрэнээччилэрин кытта үлэ, идэлэрин талалларыгар көмө буолуу, маны таһынан тус сыаллаах бырагырааманан үөрэттэрии уонна эдэр исписэлииһи салгыы хампаанньаҕа үлэ миэстэтинэн хааччыйыы. Мин санаабар, олох-дьаһах, үлэ бары хайысхатыгар идэтийбит каадыр тиийбэт кыһалҕатын биһиги, үлэ биэрээччилэр, бары бүттүүн дьаныһан быһаарыахтаахпыт.
Виктор Николаевич куонкурус кыайыылааҕын эҕэрдэлээтэ уонна үөрэххэ-үлэҕэ туттуллар гаджет чаҕылхай түгэннэри түһэрэригэр, хаачыстыбалаах видео-контены устарыгар, мантаастыырыгар, интервьюну уһуларыгар, интэриэһинэй эрэпэртээстэри оҥороругар көмө буолуоҕа диэтэ.
Алена Ксенофонтова “Кэскил” кыһаны кытта иккис сылын үлэлэһэр. Кини үлэлэрин тиэмэлэрэ билиҥҥи кэмҥэ тоҕоостоохторунан уонна айымньылаахтарынан уратылаахтар. Хадаар медиа-оскуолатыгар дьарыктанар, маны таһынан улуустааҕы, өрөспүүбүлүкэтээҕи билим-бырактыычаскай кэмпириэнсийэлэрин көхтөөх кыттааччыта. Алена Виктор Лебедев анал бирииһин сэргэ пуорум тэрийээччилэриттэн Москубаҕа эдэр кэрэспэдьиэннэр куурустарыгар үөрэнэ барар путевканы ылбыт үөрэнээччилэртэн биирдэстэрэ.
Яна БАЙГОЖАЕВА.
