Кулун тутар 2 күнүгэр Ытык Таатта сиригэр “Симэх” Национальнай киин уонна Таатта улууһун дьаһалтатын Сөбүлэһиилэригэр олоҕуран Былатыан Ойуунускай аатынан Тааттатааҕы норуодунай тыйаатыр дьиэтигэр Уус дьиэтэ аһылынна.
Уус дьиэтин аһыллыытыгар Б.Ф.Неустроев-Мандар Уус, Тааттааҕы норуот айымньытын дириэктэрэ Г.Г. Вырдылин, Таатта улууһун мунньаҕын бэрэссэдээтэлэ П.П. Максимов, “Симэх” норуот ускуустубатын уонна уус-уран оҥоһуктарын национальнай киинин уус-уран оҥоһуктары сайыннарар салаатын салайааччыта Д.К. Осипов кыһыл лиэнтэни быстылар, эҕэрдэ тыл эттилэр.
Уус дьиэтигэр тимиринэн гравировка, маһынан, туоһунан, туойунан, кылынан-сиэлинэн, сахалыы таҥастары тигиигэ, талах оҥоһуктарга, оҕуруонан, тириинэн иистэниигэ, сувенир оҥоруутугар, муостан, көмүстэн уһаныыга барыта 12 үлэ миэстэтэ тэрилиннэ.
Мантан антах12 көрүҥҥэ олохтоохторго араас маастар-кылаас ыытыахтара. “Уус дьиэтэ” уран тарбахтаахтар түмсэр, маастардар үлэлиир, уһанар сирдэрэ буолуоҕа.
«Симэх» киин.
