Бүгүн, кулун тутар 12 күнүгэр, Уопсай юрисдикциялаах тохсус кассационнай суут (Владивосток к.) СӨ Үрдүкү суута Анатолий Чомчоевы быһаҕынан анньан өлөрө сатаабыт Дмитрий Ермолов үҥсүүтүнэн таһаарбыт быһаарыытын «улахан холуобунай-процессуальнай кэһиилэрдээҕин» иһин көтүрэргэ быһаарда. Суут мунньаҕа видео-кэмпириэнсийэ сибээһинэн ыытылынна.
Эмсэҕэлээччи уонна буруйданааччы интэриэһин көмүскээччилэр этиилэрин кытта борокуруор санаатын истэн баран, суут кэллиэгийэтэ СӨ борокуруорун киллэригин, эмсэҕэлээччи албакааттара Кысылбаев уонна Жунусов кассацияҕа үҥсүүлэрин толору ылынарга, СӨ Үрдүку суутун быһаарыытын көтүрэргэ уонна буруйданааччы Ермолов Дьокуускай куорат суутун бириигэбэригэр үҥсүүтүн саҥа састаабынан хаттаан көрөргө быһаарда.
Санатар буоллахха, 2023 сыл алтынньы 17 күнүгэр СӨ Үрдүкү суутун Окороков бэрэссэдээтэллээх кэллиэгийэтэ, Дьокуускай куорат суута Дмитрий Ермоловы «Холуобунай кодекс 111 ыстатыйатын 2-с чааһын З пуунунан «Бирэдимиэти өлөрөр сэп быһыытынан туттан киһи доруобуйатыгар ыар эчэйиини оҥорбутун иһин» уопсай режимнээх холуонньаҕа 3 сылга ыытар» бириигэбэрин көтүрэн, саба түһээччини «көмүскэнээччигэ» кубулутан баран көҥүлгэ ыыппыта.
Онон, 2022 сыл ыам ыйын 12-с түүнүгэр хара санаалаах ыалдьыт илиититтэн улаханнык эмсэҕэлээбит Анатолий Чомчоев дьыалатыгар бүтэһиктээх туочука турара өссө да ыраах. Кыраҕатык кэтиибит уонна сөптөөх быһаарыы тахсарыгар эрэнэбит.
Бэйэ кэр.
