Нерюнгри к. силиэстийэлиир отдела хомуйбут матырыйаалынан 46 саастаах Нерюнгри олохтооҕор буруйдуур бириигэбэри таһаардылар. Кини РФ ХК 291 ыстатыйатын 3 чааһынан дуоһунастаах киһиэхэ сокуоннайа суоҕа эрдэттэн биллэр дьайыылары оҥорорун иһин тиксиһиннэрээччи нөҥүө улахан кээмэйдээх бэрик биэрбитэ дакаастанна.
Ол курдук, буруйданааччы 2017 с. арыгы иһэн баран тырааныспары ыыта сылдьан тутуллубут уонна мэдиссиинэ бэрэбиэркэтин ааһартан батыммыт. 2022 сыллаахха кини билэр киһитин көрсүбүт. Бу киһи буруйданааччыга ГИБДД иниспиэктэрин кытта ПДД эксээмэнин туттарбытын туһунан сымыйанан суруйтаран ыларга кэпсэтэр кыахтааҕын эппит. Буруйданааччы киниэхэ ити «өҥөҕө» төлүөхтээх харчытын биэрбит, онтон сотору кэминэн массыына ыытар дастабырыанньатын ылбыт.
Силиэстийэ кэмигэр буруйданааччы гараһыгар уонна массыынатыгар бобуу уурдулар. Холуобунай дьыала матырыйаалынан суут кинини 5 сылга уопсай режимнээх холуонньаҕа ыытарга уонна 700 000 солкуобайдаах ыстараап аныырга быһаарда.
Бэрик ылбыт ОГИБДД үлэһитигэр эмиэ холуобунай дьыала тэриллэн суукка көрүллэр.
Сонун төрдө: СӨ Силиэстийэлиир кэмитиэтэ
