Кулун тутар 22 күнүгэр Москуба уобалаһын Красногорскай куоратыгар сүүһүнэн киһи өлүүлээх улахан теракт оҥоһуллан аан дойдуну аймаата. 137 киһи өллө, 182 киһи бааһырда, эчэйдэ.
Дьокуускай олохтоохторо Кыайыы болуоссатыгар дьоруой-куорат Москуба билиитэтин иннигэр мемориал тэрийэн теракт сиэртибэлэрин кэриэстээтилэр. Манна бастакынан эдэр дьон сибэкки аҕалан уурдулар, чүмэчи уматтылар.
Маны сэргэ, куоракка «Скорбим» диэн суруктаах билбордар ыйаннылар. Тэрилтэ дьиэлэрин үрдүттэн былаахтары түһэрдилэр. Ил Дархан Айсен Николаев ыйааҕынан кулун тутар 25 күнүн 00.00 чааһыгар диэри өрөспүүбүлүкэ үрдүнэн успуорт, култуура уонна да атын аралдьытар тэрээһиннэр тохтоотулар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Хаартыска: Мария Васильев, ЯСИА
